چین خولی ئەوینداری بۆ دروستکردنی پەیوەندی خۆشەویستی و هاوسەرگیری دەکاتەوە

ئاڤا نیوز

 

حکومەتی چین بە ئامانجی بەرنگاربوونەوەی دابەزینی ژمارەی دانیشتووان  خولی "ئەوینداری بۆ پەیوەندی خۆشیەویستی" بە ئامانجی هاندانی هاووڵاتیانی وڵاتەکەی بۆ وەچەخستنەوە دەکاتەوە.

 

وێنە گەورەکە: چین ڕووبەڕووی قەیرانێکی گەورەی کەمبوونەوەی ژمارەی دانیشتوانی بووەتەوە، بۆ چارەسەرکردنیشی دەستی بە کەمپێنێک بۆ هاندانی تاکەکانی کۆمەڵگا بۆ دروستکردنی پەیوەندیی خۆشەویستی، هاوسەرگیریکردن کردووە تاوەکو لەو ڕێگەیەوە خێزانەکان منداڵ و وەچەی زیاتر بخەنەوە.

 

زانیاریی زیاتر: حکوومەتی چین دەستیان بە پروپاگەندەی منداڵبوون کردووە و بە پێدانی 14 هەزار دولار، هانی خێزانەکان دەدەن منداڵی دووەم و زیاتریشیان ببێت.

 

ئەوەی پێویستە بیزانیت: نزمبوونەوەی گەشەی دانیشتوان و زیاتربوونی ڕێژەی مردن بە بەراورد بە رێژەی لەدایکبوون، ئاستەنگێکی گەورەی لە چین دروست کردووە.

 

چی روو دەدات: زانکۆکان و دەسەڵاتە خۆجێییەکان خولی "ئەوینداری" بۆ قوتابیان و ئەندامانی کۆمەڵگا دەکەنەوە، کە تیایدا لە کەمپەینێکی سەرانسەریدا سینگڵەکان بۆ پەیوەندیی خۆشەویستی و هاوسەرگیری و منداڵبوون هان دەدەن، میدیای حکوومەتیش بە شێوەیەکی بەردەوام باس سوودەکانی منداڵبوون دەکات.

 

لەلایەکی دیکە: وانگ فنگ، شارەزای دیمۆگرافی لە زانکۆی کالیفۆرنیا پێیوایە، بەکارهێنانی ئەم شێوازە وەک شێوازی پەیڕەوکردنی "سەردەمی سیاسەتی یەک منداڵ"ـیە کە لە ساڵی 1980 بۆ ماوەی 35 ساڵ کاری پێکرا.