لە هەولێر 10 وەبەرهێنەر سزای دارایی دەدرێن

ئاڤا نیوز

 

بەڕێوەبەری وەبەرهێنانی هەولێر ئاشكرای دەكات كە بەهۆی كەمتەرخەمییەوە 10 وەبەرهێنەر سزای دارایی دراون. هاوكات سێ پڕۆژەش لە وەبەرهێنەرەكانیان وەرگیراونەتەوە و دراون بە وەبەرهێنەری دیكە.

 

بۆچی گرنگە: دەستەی وەبەرهێنان و بەڕێوەبەرایەتییەكان لە شارەكان چاودێری پڕۆژەكانی نیشتەجێبوون دەكەن و هەر وەبەرهێنەرێك سەرپێچیی ڕێنماییەكان بكات سزای دارایی دەدرێت، ئەمەش گرنگە بۆ ئەوەی وەبەرهێنەرەكانی تر خۆیان سەرپێچیی ڕێنماییەكان نەكەن.

 

لێدوانی فەرمی: سامان عارەب، بەڕێوەبەری وەبەرهێنانی هەولێر لە چوارچێوەی بەشداریكردنی لە بەرنامەی مۆری ئاڤا ڕایگەیاند:  بەهۆی كەمتەرخەمی و سەرپێچیی ڕێنماییەكان لە سنووری هەولێر 10 وەبەرهێنەر سزای دارایی دراون و ڕێنماییەكانی ئەنجوومەنی وەزیران لەمبارەیەوە وەك خۆیان جێبەجێ كراون و جیاوازی لەنێوان هیچ كەسێكدا نەكراوە.

لەلایەكی دیكەوە: بەپێی گوتەی بەڕێوەبەری وەبەرهێنانی هەولێر، نرخی خزمەتگوزارییەكان لە پڕۆژەیەك بۆ پڕۆژەیەكی دیكە جیاوازن، ئەویش بە هۆی جیاوازیی ئاستی خزمەتگوزارییەكانە، بۆ نموونە لە پڕۆژەیەك ڕێژەی سەوزایی زیاتر بێت پێویستی بە كرێكار و خزمەتكردنی زیاترە بەمەش دەبێت ئەو بڕە پارەیەی وەردەگیرێت زیاتر بێت لە پڕۆژەیەك كە ڕێژەی سەوزاییەكەی كەمتر بێت یان باڵەخانە بەرزەكان كە پێویستییان بە پاككردنەوە و چاودێریی زیاترە بەراورد بە خانووی ئاسایی.

 

بەڕێوەبەری وەبەرهێنانی هەولێر گوتیشی: هیچ وەبەرهێنەرێك بۆی نییە گۆڕانكاریی لە نرخی كارەبای نیشتمانی و مۆلیدە بكات، بەڵكو نرخەكان لەلایەن دەستەی وەبەرهێنانەوە دیار دەكرێن.