هەفتەی داهاتوو بەغدا بڕێک پارە بۆ مووچەی مانگی 11 دەنێرێت

ئاڤا نیوز

وەزیری دارایی عێراق لەگەڵ شاندی تەکنیکی عێراق بۆ پرسی مووچەی مووچەخۆرانی هەرێمی کوردستان کۆبووەوە، شاندەکە دەرئەنجامی کۆبوونەوەکانیان لە هەولێر لە کۆبوونەوەکە خستووەتەڕوو، چاوەڕوان دەکرێت بەغدا لە هەفتەی داهاتوو بڕێک پارە بۆ مووچەی مانگی 11 بنێرێت.

 

چیرۆکی سەرەکی: ئەمڕۆ 26-12-2024، تەیف سامی، وەزیری دارایی عێراق لەگەڵ ئەو شاندەی بەغدا کۆبووەوە کە پێش چەند ڕۆژێک لە هەولێر لەگەڵ شاندی تەکنیکی هەرێمی کوردستان ڕاپۆرتێکیان سەبارەت بە مووچە و داهات و خەرجییەکانی حکومەتی هەرێمی کوردستان ئامادەکردبوو.

 

لێدوانی فەرمی: سەرچاوەیەک لە وەزارەتی دارایی و ئابووریی حکومەتی هەرێمی کوردستان بە ئاڤا نیوزی ڕاگەیاند: ڕاپۆرت و یاداشتەکانی کۆبوونەوەی هەردوو  شاندەکە لە هەولێر براوەتە لای تەیف سامی و گفتۆگۆی لەسەر کراوە، چاوڕوانی ئەنجامی کۆبوونەوەن کە چ بڕیارێک دەدرێت بەتایبەت لەبارەی ناردنی پارەکەوە.

زانیاریی زیاتر: ئاڤا زانیویەتی تاوەکو ئێستا هیچ بڕیارێک لەلایەن وەزیری دارایی عێراق لەبارەی ناردنی پارە نەدراوە. هاوکات ڕۆژی سێشەممەی ڕابردوو بە هامان شێوە لە کۆبوونەوەی ئەنجوومەنی وەزیرانی عێراق کە بە سەرپەرشتی سەرۆکوەزیران بەڕێوەچوو، هیچ بڕیارێک بۆ خەرجکردنی پارەی مووچەی خەڵکی کوردستان نەدرا.

 

زانیاریی تایبەت: بەپێی زانیارییەکانی ئاڤا، بە ئەگەرێکی زۆرەوە چاوەڕوان دەکرێت هەفتەی داهاتوو بڕێک پارە لەلایەن بەغدا بنێردرێت، بەڵام نازانرێت بڕەکەی چەندە، هەروەها بەشی پڕکردنەوەی کورتهێنانی مووچەی مانگی 11 دەکات یان نا.

 

لەلایەکی دیکەوە: لە ڕۆژانی ڕابردوودا تیمێکی تەکنیکیی وەزارەتی دارایی هەرێمی کوردستان سەردانی بەغدایان کرد، بە ئامانجی چارەسەری کورتهێنانی مووچەی مانگی 11 و یەکلاکردنەوەی پرسی مووچەی مانگی 12، لیژنەکەش گەڕاونەتەوە هەولێر. 

ئەمەش بزانە: فەرمانبەرانی حکومەتی عێراق ئێستا مووچەی مانگی 12 وەردەگرن، بەڵام تاوەکو ئێستا لە هەرێمی کوردستان تەنیا مووچەی مانگی 10 دراوە و هێشتا پارەی مووچەی مانگی 11 نەنێردراوە، بۆ مانگی 12ـش جارێ ڕوون نیە کە چارەنووسی چۆن دەبێت.