ئەندامێکی لیژنەی یاسایی پەرلەمانی عێراق بۆ ئاڤا: ساڵی داهاتوو زۆربەی یاسا هەڵپەسێردراوەکان تێدەپەڕێنین

ئاڤا نیوز

 

پەرلەمانی عێراق کەمتر لە ساڵێک تەمەنی ماوە و بە دەیان یاسا و پرۆژە یاسا ماون دەنگیان لەسەر بدرێت. بە گوتەی پەرلەمانتارێک ساڵی نوێ هەوڵ دەدرێت ئەو یاسایانە تێپەڕێنرێن.

 

وێنە گەورەکە: تێپەڕاندنی یاسا و پرۆژە یاسایەکان لە پەرلەمانی عێراق زۆر جار ناکۆکیی سیاسیی نێوان لایەنەکانی لێکەوتووەتەوە، ئەمەش زۆربەی جار بووەتە هۆکاری دەنگنەدان لەسەر هەر یاسایەک، بە تایبەتی هەر سێ یاساکەی پەیوەست بە کورد، سوننە و شیعە.

لێدوانی فەرمی: محەممەد عنوز، ئەندامی لیژنەی یاسایی لە پەرلەمانی عێراق بە ئاڤا میدیای ڕاگەیاند:

•    پەرلەمانی عێراق لە کۆتا ساڵی تەمەنیەتی و هێشتا 130 یاسای هەڵپەسێردراو ماون دەنگیان لەسەر بدرێت، کە بەشێکیان هی خولەکانی پێشووترن بۆیە هەوڵ دەدەین هەموو ئەو یاسایانە تێپەڕێنین.
•    هۆکاری دەنگنەدان لەسەر ئەو یاسایانە بۆ ناکۆکیی نێوان لایەن و حیزبەکان لەسەر بەشێک لە بڕگەکان دەگەڕێتەوە، هەروەها پەکخستنی کاری یاسایی بەهۆی ئەو ناکۆکییانەی نێوان لایەنەکان.

 

ئەوەی پێویستە بیزانیت: پەرلەمانی عێراق لە پشووی یاساداناندایە و  لە 9ی مانگی یەکەمی ساڵی داهاتوو دەست بە کاری یاسادانان دەکاتەوە، ئەوەش لە کاتێکدایە تەنیا 10 مانگی ماوە تاوەکو تەمەنی یاسایی تەواو بێت.