سلێمانی ئامادەکاری بۆ پێشوازی لە گەشتیاران دەکات

ئاڤا نیوز

جیاواز لە ساڵانی ڕابردوو و بەهۆی ئامادەکاریی بۆ پێشوازی لە سەری ساڵی نوێ پێشبینی دەکرێت ڕێژەی هاتنی گەشتیاران ڕوو لە زیادبوون بێت، پارێزگاری سلێمانیش لەوبارەیەوە دەڵێت: "پێشبنی بەرزبوونەوەی ڕێژەی هاتنی گەشتیاران دەکەین بۆ سلێمانی".

 

وێنە گەورەکە: ساڵانە لەگەڵ نزیکبوونەوە لە بۆنە و ئاهەنگەکان، گەشتیارێکی زۆر لە ناوچەکانی خوار و ناوەڕاستی عێراق و دەرەوەی وڵات سەردانی هەرێمی کوردستان دەکەن، پێشبینی دەکرێت بۆ سەری ساڵ 200 هەزار گەشتیار ڕوو لە ناوچە جیاوازەکانی کوردستان بکەن.

 

لێدوانی فەرمی: هەڤاڵ ئەبوبەکر، پارێزگاری سلێمانی بە ئاڤا میدیای ڕاگەیاند: هەموو ئامادەکارییەک لە ڕووی دابینکردنی خزمەتگوزارییە گشتییەکان و ئاسایش و ئارامی بۆ پێشوازیکردن لە گەشتیاران تەواو کراوە.

 

پارێزگاری سلێمانی باسی لەوەشکرد: پێشبینی هاتنی ژمارەیەکی زۆر گەشتیار دەکەین، بەڵام هیچ ئاهەنگێکی فەرمی لەلایەن حکومەتەوە ڕێک نەخراوە.

 

زانیاریی زیاتر: لە ساڵی 2023 دا حەوت ملیۆن و 279 هەزار و 913 گەشتیار هاتوونەتە کوردستان، پێشبینی دەکرێت ساڵی ئایندە ئەو ڕێژەیە ڕوو لە بەرزبوونەوە بکات.