شاخەوان عەبدوڵڵا: بڕیارە ئەمڕۆ گوژمەیەک پارە بۆ هەرێمی کوردستان بنێردرێت

ئاڤا نیوز

 

هەفتەی ڕابردوو ئەنجوومەنی وەزیران عێراق کۆبووەوە و بە وتەی جێگری سەرۆکی پەرلەمانی عێراقیش، هەردوو حکومەتی هەرێمی کوردستان و حکومەتی فیدراڵ لەسەر هێڵن بۆ چارەسەری گرفتی ناردنی مووچەی فەرمانبەران. 

 

وێنە گەورەکە: تەنها ئەمڕۆ و سبەی ماوە بۆ یەکلاکردنەوەی ناردنی تەواوکاری مووچەی مانگەکانی 11 و 12 لەلایەن بەغداوە، وەزارەتی دارایی هەرێمی کوردستانیش لەچاوەڕوانی خەرجکردنی پارەکەدایە بۆ ئەوەی لیستی مووچەی مانگی 11 ڕابگەیەنێت.

 

لێدوانی فەرمی: شاخەوان عەبدوڵڵا، جێگری سەرۆکی پەرلەمانی عێراق لە کۆنگرەیەیکی ڕۆژنامەوانیدا ڕایگەیاند، "هەفتەی ڕابردوو لەئەنجوومەنی وەزیرانی عێراق بڕیاردرا، ڕۆژی دووشەممە هەوڵبدرێت گوژمەیەک پارە بۆ هەرێمی کوردستان بنێردرێت، حکومەتی هەرێمی کوردستان و حکومەتی فیدڕاڵیش لەسەر هێڵن بۆ ئەوەی کورهێنانی مانگی 11 و گوژمەیەکی پارە بۆ هەرێمی کوردستان بنێردرێت."

 

لەلایەکی دیکەوە: لە پەرلەمانی عێراق ماددەی 60 لە یاسای بودجە زیاد کراوە کە دەسەڵات بە سەرۆکوەزیرانی عێراق دەدات، گواستنەوەی پارە بکات ئەگەر کورتهێنان لە مووچەی دامەزراوەیەکدا هەبوو، ئەم ڕێکارانە ساڵی 2025 ـیش دەگرێتەوە و دەتوانرێت دەسەڵاتەکە بۆ پڕکردنەوەی کورتهێنانی مووچە بەکاربهێنرێت.