وەزارەتی نەوتی عێراق: مانگی ڕابردوو نزیکەی 6 ملیۆن بەرمیل نەوتی کوردستان هەناردەی بازاڕەکان کراوە

ئاڤا نیوز

وەزارەتی نەوتی عێراق ئاماری بڕی نەوتی هاوردەکراو و داهاتی نەوتیی مانگی 10ی ئەمساڵی بڵاو کردووەتەوە. بەگوێرەی وەزارەتەکە مانگی ڕابردوو نزیکەی شەش ملیۆن بەرمیل نەوتی هەرێمی کوردستان هەناردەکراوە.

 

وێنە گەورەکە: هەموو مانگێک کۆمپانیای بەبازاڕکردنی نەوتی عێراقی(سۆمۆ) سەر بە وەزارەتی نەوتی عێراق ئاماری هەناردەکردنی نەوت و داهاتەکەی بڵاو دەکاتەوە، بەگوێرەی بڵاوکراوەی وەزارەتەکەش کۆی گشتی داهاتی نەوتیی مانگی تشرینی یەکەمی ئەمساڵ زیاتر لە حەوت ملیار دۆلار بوو.

 

ڕاگەیێنراوی فەرمی: بەگوێرەی ئاماری مانگی 10ی ئەمساڵی سۆمۆ، 110 ملیۆن و 923 هەزار و 47 بەرمیل نەوتی خاو هەناردە کراوە، داهاتەکەی حەوت ملیار و 30 ملیۆن و 689 هەزار دۆلار بووە.

 

ژمارەکان وا دەڵێن: ئەو بڕە نەوتەی لە کێڵگەکانی ناوەڕاست و باشووری عێراق هەناردەکراوە گەیشتووەتە 104 ملیۆن و 816 هەزار و 106 بەرمیل. هاوکات بڕی هەناردەکراو لە هەرێمی کوردستانەوە لە ڕێگەی بەندەری جەیهانی تورکی پێنج ملیۆن و 834 هەزار و 864 بەرمیل بووە.