وەزیرانی دەرەوەی عێراق و سووریا جەخت لە هەماهەنگی ئەمنی دەکەنەوە

ئاڤا نیوز

 

وەزیری دەرەوەی عێراق بە تەلەفۆن لەگەڵ هاوتا سوورییەکەی قسەی کرد و جەختی لەسەر گەڕاندنەوەی تەواوی ئەندامانی تیمی دیبلۆماسی وڵاتەکەی کردەوە بۆ دیمەشق، هاوکات وەزیری دەرەوەی سووریا جەختی لەسەر گرنگی بەردەوامی پەیوەندی نێوانیان کردەوە. 

 

وێنە گەورەکە: دوای پێکهێنانی حکومەتی نوێی سووریا و دەستبەکاربوونی ئەسعەد شیبانی وەک وەزیری دەرەوەی سووریا، بۆ یەکەمجار هەردوو وەزیری عێراق و سووریا پەیوەندییەکی تەلەفۆنیان ئەنجامدا.

 

ڕاگەیێنراوی فەرمی: وەزارەتی دەرەوەری عێراق لە بەیاننامەیەکدا ڕایگەیاند: هەردوو وەزیری جەختیان کردەوە کە ئاسایش و سەقامگیریی هەردوو وەڵات گرێدراوی یەکە، شیبانی باسی لەوەکرد ئاسایش و سەلامەتی عێراق بەشێکە لە ئاسایش و سەلامەتی سووریا. 

 

فوئاد حوسێن باسی چالاکییەکانی داعش کردووە لەسەر سنووری هاوبەشی هەردوو وڵات و جەختی لەسەر هاوکاری و هەماهەنگی نێوانیان کردەوەو بە بەرەنگاربوونەوەی ئەندامانی ئەو ڕێکخراوە، هاوکات شیبانیش ئامادەی سووریای دووپاتکردەوە بۆ هەماهەنگی تەواوەتی نێوانیان لە هەڕەشکردنیان بۆ سەر ئاسایشی هەردوو وڵات. 

 

ئەوەی پێویستە بیزانیت: ڕۆژی 26-12-2024، شاندێکی عێراق بە سەرۆکایەتیی حەمید شەتری، سەرۆکی دەزگای هەواڵگریی عێراق گەیشتە دیمەشق و لەگەڵ ئەحمەد شەرع و بەرپرسانی ئیدارەی نوێی سووریا کۆبووەوە و چەند پرسێکی ئەمنیان تاوتوێ کرد.