گرفتی نەبوونی نەختینە مووچەی مووچەخۆرانی هەرێمی کوردستان دوادەخات

ئاڤا نیوز

 

ئەمڕۆ دوایین وادەیە بۆ ئەوەی وەزارەتی دارایی حکومەتی فیدراڵ، تەواوکاری مووچەی مانگەکانی 11 و 12ی مووچەخۆرانی هەرێمی کوردستان خەرج بکات، بەڵام بەهۆی گرفتی نەبوونی نەختینەوە لە بانکەکانی عێراق بە ئەگەری زۆرەوە دوادەکەوێت. 

 

وێنە گەورەکە: وەزارەتی دارایی هەرێمی کوردستان بڕی 396 ملیار دیناری لەبەردەستدایە بۆ مووچەی مانگی 11 و لەچاوەڕوانی ناردنی تەواوکاری دایە بۆ ئەوەی لیستی مووچەی ڕابگەیەنێت و دەست بە دابەشکردنی مووچەی ئەو مانگە بکات. 

 

زانیاریی بەدەستهاتوو: لە بانکەکانی بەغدا بەشێکی زۆری مووچەخۆران تا ئێستا مووچەیان وەرنەگرتووە بەهۆی نەبوونی پارەی نەختینە لە بانکەکان، مووچەی مانگی 12یان دواکەوتووە، ئەمەش کاریگەری لەسەر ناردنی پارە بۆ هەرێمی کوردستان دەبێت.

 

لەلایەکی دیکەوە: شاخەوان عەبدوڵڵا، جێگری سەرۆکی پەرلەمانی عێراق لە کۆنگرەیەیکی ڕۆژنامەوانیدا ڕایگەیاند، "هەفتەی ڕابردوو لەئەنجوومەنی وەزیرانی عێراق بڕیاردرا، لەم هەفتەیە هەوڵبدرێت گوژمەیەک پارە بۆ هەرێمی کوردستان بنێردرێت، حکومەتی هەرێمی کوردستان و حکومەتی فیدڕاڵیش لەسەر هێڵن بۆ ئەوەی کورهێنانی مانگی 11 و گوژمەیەکی پارە بۆ هەرێمی کوردستان بنێردرێت."