ئەمساڵ زیاتر لە 172 هەزار ئۆتۆمبێل هاوردەی هەرێمی کوردستان کراون

ئاڤا نیوز

 

ئەمساڵ ژمارەی مۆڵەتدان و هاوردەکردنی ئۆتۆمبێل بۆ هەرێمی کوردستان زیادیان کردووە، لە ماوەی یەک ساڵدا زیاتر لە 172 هەزار ئۆتۆمبێل هاوردەی هەرێمی کوردستان کراون و بەشێکیان بۆ شارەکانی ناوەڕاست و خوارووی عێراق نێردراون.

 

وێنە گەورەکە: بەهۆی کەمی جۆری هۆکارەکانی گواستنەوە، هاونیشتمانیانی هەرێمی کوردستان و عێراق بەشێوەیەکی سەرەکی بۆ هاتووچۆکردن پشت بە ئۆتۆمبێل دەبەستن، ئەمەش وایکردووە خواست لەسەر کڕینی ئۆتۆمبێل زۆر بێت.

 

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە هەرێمی کوردستان بە ئاڤا میدیای وت، ئەمساڵ 924 مۆڵەتی هاوردەکردنی ئۆتۆمبێل دراوە، لە هەریەکە لە دەروازەکانی ئیبراهیم خەلیل، پەروێزخان، باشماخ و پەروێزخان 172 هەزار و 234 ئۆتۆمبێل لە وڵاتەکانی وەک سین، یابان، ئەمریکا و وڵاتانی کەنداو هاوردەی هەرێمی کوردستان کراون، بەشێک لەو ئۆتۆمبێلانە بۆ شارەکانی دیکەی عێراق ڕۆیشتوون.

لەلایەکی دیکەوە: ساڵی ڕابردوو 900 مۆڵەت بە بازرگانان دراوە و 122 هەزار ئۆتۆمبێلیش هاوردە کرابوو. بەمجۆرە بێت ئەمساڵ بەراورد بە ساڵی ڕابردوو 50 هەزار ئۆتۆمبێل زیاتر هاوردە کراوە.

 

باکگراوند: بەگوێرەی دواین سەرژمێری، ژمارەی دانیشتووانی هەرێمی کوردستان شەش ملیۆن و 370 هەزار و 668 کەسە، ئەگەر ئەو ژمارەیە دابەشی ژمارەی ئۆتۆمبێلی تۆمارکراو بکرێت کە زیاترە لە دوو ملیۆن و 200 هەزار ئۆتۆمبێل، لە هەرێمی کوردستان هەر سێ کەس ئۆتۆمبێلێکی بەر دەکەوێت.