چوارچێوەی هەماهەنگی بۆ ئاڤا: گۆڕانکاریی وەزاری لە کابینەکەی سوودانی بووە ڕابردوو

ئاڤا نیوز

 

پەرلەمانتارێکی چوارچێوەی هەماهەنگی ڕەتیدەکاتەوە هیچ گۆڕانکارییەکای وەزاری لە کابینەکەی سوودانی بکرێت و ئاماژە بۆ ئەوە دەکات ئەو بابەتە بووەتە "ڕابردوو".

 

وێنە گەورەکە: لە ناوەڕاستی مانگی تشرینی دووەمی ئەمساڵ لیژنەی هەڵسەنگاندن بۆ توانا و لێهاتویی وەزیرەکانی عێراق، ڕاپۆرتی کۆتایی پێشکەش بە سەرۆکوەزیرانی عێراق کردبوو، ڕاسپاردەی لیژنەکە بۆ سوودانی دوورخستنەوەی سێ بۆ پێنج وەزیر بوو لە کابینەی حکومەت.

 

لێدوانی فەرمی: محەمەد ڕازی، پەرلەمانتاری هاوپەیمانی دەوڵەتی یاسا بە ئاڤا میدیای ڕاگەیاند، "گۆڕانکاری وەزاری لە حکومەتی سوودانی بۆتە شتێکی ڕابردوو و لە قۆناغی داهاتوودا هیچ گۆڕانکارییەک ناکرێت".

 

هۆکارە زانراوەکان: بە گوتەی ڕازی لەبەر دوو هۆکاری گرنگ ئەم گۆڕانکارییە لەم کابینەیە ناکرێت، یەکەمیان؛ نەبوونی ئیرادەی سیاسی بۆ ئەنجامدانی ئەو کارە کە ڕێگرە لە هەوڵەکانی سوودانی بۆ جێبەجێکردنی بەڵێنەکانی و دووەمیان کابینەکە نزیک دەبێتەوە لە کۆتایی تەمەنی کە تەنیا یەک ساڵ ماوە.

 

لەلایەکی دیکە: پێشتر محەممەد سەیهوود، ئەمینداری گشتیی "تەجەمموع ئەجیال" لەبارەی ئەگەری دوورخستنەوەی وەزیرەکان و بەربەستەکانی بەردەم سوودانی، ڕایگەیاندبوو سوودانی سوورە لە گۆڕینی ژمارەیەک وەزیر، بەڵام لەلایەن پەرلەمانەوە بەربەستی بۆ دروست دەکرێت، چونکە پرسی هەڵبژاردنی وەزیری نوێ پێویستی بەکۆدەنگی ئەندامانی پەرلەمان هەیە و ئەستەمە دەنگ بەو وەزیرانە بدرێت کە سوودانی کاندیدیان دەکات.

 

ئەوەی لەوبارەیەوە دەگوترێت: ڕۆژی 4-12-2024، پەرلەمانی عێراق بە ئامادەبوونی محەممەد شیاع سوودانی کۆبووەوە، عامر فایز، پەرلەمانتاری عێراق ئەوکات ڕایگەیاند: لەمیانی دانیشتنە نهێنییەکەی پەرلەماندا، سەرۆکوەزیرانی عێراق جەختی لەوە کردەوە کە حکومەتی ئێستا، حکومەتێکی هاوپەیمانییە و هیچ گۆڕانکارییەکی وەزاری بەبێ ڕێککەوتنی پێشوەختەی لایەنە سیاسییەکان ناکرێت.