کەسێک بە تۆمەتی بڕینەوەی داربەڕوویەکی 100 ساڵ دەستگیردەکرێت

ئاڤا نیوز

 

لە ناحیەی بەرزنجەی سەر بە پارێزگای سلێمانی، هێزەکانی پۆلیسی دارستان کەسێکیان دەستگیرکرد لە کاتی بڕینەوەی داربەڕوویەک کە تەمەنی زیاتر لە 100 ساڵە. تۆمەتبارەکە بە پۆلیسی وتووە هۆکاری بڕینەوەی دارەکەی بۆ خۆگەرمکردنەوە بووە.

 

لێدوانی فەرمی: عەمید هێمن کەمال، بەڕێوەبەری ڕاگەیاندنی پۆلیسی دارستانی سلێمانی ڕایگەیاند، " لەکاتی بڕینەوەی داربەڕوویەکی تەمەن 100ساڵدا کەسێکمان دەستگیرکردووە، بەپێی یاسا ئەم کارە سەرپێچییە و کەسەکە بە پێبژاردنی پێنج ملیۆن دینار سزادەدرێت". 

 

زانیاریی زیاتر: لە ماوەی یەک مانگدا ئەمە دووەمین حاڵەتی بڕینەوەی دارە بەتەمەنەکانە لە سنووری ناحیەی بەرزنجە، هەردووجارەکە تۆمەتباران دەستگیرکراون و پەڕاوی لێکۆڵینەوەیان بۆکراوەتەوە و ڕادەستی دادگا کراون.