وادەی سەردانەکەی سوودانی بۆ تاران ئاشکرا دەکرێت

ئاڤا نیوز

وەزارەتی دەرەوەی ئێران ئاشکرای دەکات، کۆتایی هەفتەی داهاتوو محەممەد شیاع سوودانی، سەرۆکوەزیرانی عێراق سەردانی تاران دەکات و لەگەڵ بەرپرسانی باڵا کۆ دەبێتەوە، ئەوەش دوای ئەوە دێت میدیاکانی عێراق ڕایانگەیاندبوو لەم هەفتەیەدا سوودانی دەچێتە ئێران.

 

وێنە گەورەکە: سوودانی لە سێ هەفتەی ڕابردوودا و دوای ڕووخانی دەسەڵاتی بەشار ئەسەد سەردانی چەند وڵاتێکی دراوسێی کردووە و لە یەکەمین گەشتی ئەمساڵیش ڕوو لە ئێران دەکات.
 
ڕاگەیێنراوی فەرمی: ئیسماعیل بەقائی، وتەبێژی وەزارەتی دەرەوەی ئێران ڕایگەیاند: محەممەد شیاع سوودانی، سەرۆکوەزیرانی عێراق لە کۆتایی هەفتەی داهاتوو سەردانی تاران دەکات و چاوی بە بەرپرسانی باڵای ئەو وڵاتە دەکەوێت، ئامانجی سەردانەکەش فراوانکردنی پەیوەندیی دووقۆڵییەکانە و تاوتوێی پێشهاتەکانی ناوچەکە دەکەن.

 

ئەوەی پێشبینی دەکرێت: سوودانی لە سەردانەکەی بۆ ئێران تاوتوێی پرسی گرووپە چەکدارەکان دەکات کە ئەمریکا لەبارەی هەڵوەشاندنەوەیان هۆشداریی بە عێراق داوە و پرسی دووەمیش، پرسی غازی تورکمانستانە کە عێراق ڕێکەوتنی لەگەڵ ئەو وڵاتە و ئێران کردووە بۆ دابینکردنی غازی تورکمانستان لەڕێگەی ئێرانەوە، پرسی سێیەمیش، دۆخی سووریایە.

 

ئەوەی پێویستە بیزانیت: دوای ڕووخانی دەسەڵاتی بەشار ئەسەد لە سووریا، سەرۆکوەزیرانی عێراق چەندین سەردانی بۆ وڵاتانی ناوچەکە کردووە، لەوانەش ئوردن و سعوودیە، ئامانجی سەردانەکانیشی بۆ تاوتوێکردنی دۆسیەی ئاسایش و چەند پرسێکی دیکەی تایبەت بە ناوچەکە بووە