عێراق هێرشەکەی نیوئۆرلیانزی ئەمریکا بە 'مەترسیدار' ناودەبات

ئاڤا نیوز

 

وەزارەتی دەرەوەی عێراق هێرشەکەی سەر شاری نیوئۆرلیانزی ئەمریکا بە "مەترسیدار" ناودەبات و سەرکۆنەی دەکات، هاوکات توندوتیژیی و بە ئامانجگرتنی خەڵکی مەدەنیش ڕەتدەکاتەوە.

 

چیرۆکی سەرەکی: دوێنێ بارهەڵگرێک لە شەقامی بۆڕبۆن لە شاری نیوئۆرلیانزی ئەمریکا خۆی کرد بەناو کۆبوونەوەیەکی جەماوەریی کە بۆ ساڵی نوێ ڕێکخرابوو، لە ئاکامدا 15 کەس گیانیان لەدەستدا و دەیانی دیکەش برینداربوون، باس لەوەش دەکرێت کە هێرشکارەکە پەیوەندیی لەگەڵ داعش و گرووپە تووندڕەوەکانی دیکەدا هەبووە. 

 

ڕاگەیێنراوی فەرمی: وەزارەتی دەرەوەی عێراق لە ڕاگەیێنراوێکدا ئاماژەی بەوەکردووە، هێرشە مەترسیدارەکەی شاری نیوئۆرلیانزی ئەمریکا سەرکۆنە دەکات و سەرەخۆشیش لە حکومەتی ئەمریکا و کەسوکاریی ئەوانە دەکات کە لە ڕووداوەکەدا گیانیان لەدەستداوە.
 
وەزارەتی دەرەوە جەختیش دەکاتەوە کە هەڵوێستی نەگۆڕی عێراق ئەوەیە، "هەموو جۆرە توندوتیژییەک ڕەتدەکەینەوە کە هاووڵاتیانی مەدەنی بە ئامانج بگرێت".