لە نیویۆرک بەهۆی ڕووداوێکی تەقەکردنەوە 11 کەس برینداربوون

ئاڤا نیوز

 

تەنها لەماوەی 24 کاتژمێردا چەند ڕووداوێکی توندوتیژی لە ئەمریکا ڕوویانداوە کە بەهۆیانەوە چەندین هاووڵاتی بووەنەتە قوربانی، لەکۆتا ڕووداویشدا بەهۆی ڕووداوێکی تەقەکردنەوە 11 کەس برینداربوون.

 

وێنە گەورەکە: دوێنێ بارهەڵگرێک لە شەقامی بۆڕبۆن لە شاری نیوئۆرلیانزی ئەمریکا خۆی کرد بەناو کۆبوونەوەیەکی جەماوەریی کە بۆ ساڵی نوێ ڕێکخرابوو، لە ئاکامدا 15 کەس گیانیان لەدەستدا و دەیانی دیکەش برینداربوون، هاوکات ئۆتۆمبێلێکی سایبەرترەکی کۆمپانیای تێسلا لەبەردەم هۆتێلێکی ترەمپ لە شاری لاس ڤێگاسی ویلایەتی نیڤادای ئەمریکا تەقییەوە کە بەهۆیەوە کەسێک گیانی لەدەستدا و حەوتی دیکەش برینداربوون. لەدوای ئەو هێرشانەش ڕووداوێکی تەقەکردن لە نیویۆرک ڕوودەدات. 

 

زانیاریی بەدەستهاتوو: میدیاکانی ئەمریکا بڵاویانکردەوە، بەهۆی ڕووداوێکی تەقەکردنەوە لەناوچەی کوینزی نیویۆرک 11 کەس برینداربوون و ئێستا بریندارەکان گواستراونەتەوە بۆ نەخۆشخانە و لێکۆڵێنەوەش لە ڕووداوەکە بەردەوامە بۆ زانینی هۆکاری ئەنجامدانی هێرشەکە.

 

لەلایەکی دیکەوە: دوای ڕووداوەکەی نیو ئۆرلینز لە ئەمریکا کە تیایدا بارهەڵگرێک خۆی کرد بە نێو کۆبوونەوەیەکی خەڵکدا و ژمارەیەک کەس بەهۆیەوە گیانیان لەدەستدا، ئێف بی ئای ڕایگەیاند، "ڕووداوەکە وەک کردەوەیەکی تیرۆرستی کاری لەسەر دەکرێت".

 

بە تەنیشت ئەم بابەتەوە: وەزارەتی دەرەوەی عێراق هێرشەکەی سەر شاری نیوئۆرلیانزی ئەمریکا بە "مەترسیدار" ناوبرد و سەرکۆنەی کرد، هاوکات توندوتیژیی و بە ئامانجگرتنی خەڵکی مەدەنیش ڕەتکردەوە.