هەواڵگریی سەربازیی دەستگیرکردنی داواکراوێک لە ڕیزەکانی داعش ڕادەگەیێنێت

ئاڤا نیوز

 

بەڕێوەبەرایەتیی هەواڵگریی سەربازیی عێراق دەستگیرکردنی داواکراوێک لە ڕیزەکانی داعش ڕادەگەیێنێت، کە کاری سەرەکی گواستنەوەی کەل و پەلی جۆراوجۆر و پێداویستی سەربازیی بووە بۆ چەکدارانی داعش لە پارێزگای کەرکووک.

 

وێنە گەورەکە: هەرچەندە لە ساڵی 2017ـەوە کۆتاییهاتنی داعش وەکو ڕێکخراوێک ڕاگەیێنراوە، بەڵام شانە نوستووەکانی ڕێکخراوەکە ماون و هەندێکجار هێزە ئەمنییەکان و هاووڵاتیانی عێراق بەئامانج دەگرن.

 

ڕاگەیێنراوی فەرمی: لە ئۆپەراسیۆنێکی جۆریی، بە پشت بەستن بە زانیاریی وردی هەواڵگری، هێزەکانی فیرقەی هەشت توانیان تیرۆریستێکی داواکراو بە پێی ماددە 4ی تیرۆر لە قەزای حەویجە لە پارێزگای کەرکووک دەستگیر بکەن.

 

وەک لە ڕاگەێێنراوەکەی بەڕێوەبەرایەتی هەواڵگریی سەربازیی عێراق هاتووە، تیرۆریستەکە لە ڕیزەکانی ڕێکخراوی تیرۆریستی داعش وەک "گوێزەرەوەی سەرەکی" بۆ مەفرەزەکانی داعش کاری کردووە و چەندین کەرەستەی جۆراوجۆری وەک بەشە خۆراک و پزیشکی و پێداویستی سەربازی بۆ چەکدارانی داعش گواستووەتەوە.