دۆخی چاكسازییەكانی هەرێمی كوردستان بەراورد بە عێراق باشترە

ئاڤا نیوز

 

تۆڕی دادپەروەری بۆ چاودێری گرتووخانەكان، نۆیەمین ڕاپۆرتی ساڵانەی خۆی لە بارەی ڕەوشی گرتووخانە و چاكسازییەكانی هەرێمی كوردستان و عێراق بڵاو کردەوە. لە ڕاپۆرتەكە دەركەوتووە؛ دۆخی چاكسازییەكان لە شارەكانی هەرێمی كوردستان بەراورد بە ناوچەكانی دیكەی عێراق، باشترە.

 

وێنە گەورەكە: لە عێراق، 27 گرتووخانە و بەڕێوەبەرایەتیی چاكسازی هەن كە 16ـەیان سەر بە وەزارەتی دادن و سێشیان سەر بە وەزارەتی ناوخۆ  و دەزگا سەربازییەكانن، هەشت گرتووخانەی چاكسازیش سەر بە وەزارەتی كار و كاروباری كۆمەڵایەتین. سەرجەم گرتووخانەكانی عێراق و هەرێمی كوردستان، بەراورد بە ڕووبەری گرتووخانەكان لە ڕێژەی دیاریكراو گرتووی زیاتریان تێدایە.

 

ئەوەی پێویستە بیزانیت: بە گوێرەی ستاندەرە جیهانییەكان و بە لەبەرچاوگرتنی مافی زیندانییان، پێویستە شوێنی مانەوەی هەر گیراوێك لە چوار مەتر چوارگۆشە كەمتر نەبێت، بەڵام ئەوە لە گرتووخانەكانی عێراق و هەرێمی كوردستان لەبەرچاو نەگیراوە و سێ ئەوەندەی ڕێژەی دیاریكراو، گیراوان تێدایە.

 

ڕاگەێنراوی فەرمی: تۆڕی دادپەروەری بۆ چاودێریی ڕەوشی گرتووخانەكان ڕایگەیاند: لە چاكسازییەكانی ئافرەتان، ڕەچاوی جیاكردنەوەی دەستگیركراوان لەسەر بنەمای ترسناكی تاوانەكەیان نەكراوە و هەموویان بە هەڕەمەكی تێكەڵ كراون.

 

ئەوەی پێویستە بیزانیت: لە بەشێك لە چاكسازییەكان، تەنانەت منداڵی بچووك و كۆرپەڵەش لەگەڵ دایكە حوكمدراوەكەیتی و تێكەڵ بە تاوانبەرەكانی دیكەن.

 

چارەسەر چییە؟

بۆ چارەسەری جەنجاڵی گرتووخانەكان، تۆڕەكە پێشنیاز دەكات پەنا بۆ سزای پێبژاردن ببردرێت لەبری هێشتنەوەیان لە گرتووخانە. لەگەڵ كاراكردنی ماددەی ئازادكردنی مەرجدار بەتایبەت بۆ ئافرەتان و كچان دوای بەسەربردنی دوو لەسەر سێی ماوەی حوكمەكەیان لە گرتووخانە.

ئەوەش بزانە: بە گوێرەی بەدواداچوونی مەیدانیی تۆڕی دادپەروەری بۆ چاودێریی ڕەوشی گرتووخانەكان، 80% بینای گرتووخانە و چاكسازییەكانی عێراق بەكەڵكی هێشتنەوەی حوكمدراوان نایێن و شوێنی پاككەرەوە و دەستشۆری پێویست و خاوێنیان نییە و بە هیچ جۆرێكیش ڕەچاوی حوكمدراوانی خاوەن پێداویستی تایبەت نەكراوە.