ڕوونکردنەوە لەبارەی لێدوانێکی وەزیری دەرەوەی فەرەنسا دەدرێت سەبارەت بە کورد

ئاڤا نیوز

 

لێدوانێک بەناوی جان نۆویل بارۆ، وەزیری دەرەوەی فەرەنسا ڕەتدەکرێتەوە کە گوایە وتویەتی، "پێویستە کوردەکان لە سووریا چەک دابنێن".

 

وێنە گەورەکە: دوای ڕووخانی دەسەڵاتی بەشار ئەسەد لە 8-12-2024، شاندی بەشێکی بەرچاوی وڵاتان سەردانی دیمەشق دەکەن، ئەمڕۆ وەزیرانی دەرەوەی ئەڵمانیا و فەرەنسا سەردانی دیمەشقیان کردووە و وەزیری دەرەوەی فەرەنسا لەبارەی کورد لەو وڵاتە پەیامێکی نوێی هەبوو.

 

لێدوانی فەرمی: د.عادل باخەوان، سەرۆکی ناوەندی فەرەنسی بۆ توێژینەوە لەسەر عێراق لە پەڕەی فەرمی خۆی لە تۆڕی کۆمەڵایەتی فەیسبووک بڵاویکردوەتەوە و دواتر بۆ ئاڤا میدیا قسەیکردووە دەڵێت: بەشێک لە ڕاگەیاندنە عەرەبی و کوردییەکان قسەی وەزەیری دەرەوەی فەرەنسایان شێواندووە جا نازانرێت بە هەڵە ڕوویداوە یان بە ئەنقەست بووە.

 

زانیاریی زیاتر: لە چەند دەزگایەک وا بڵاوکراوەتەوە، جان نۆویل بارۆ، وەزیری دەرەوەی فەرەنسا وتویەتی "پێویستە کورد چەک دابنێن و تێکەڵی دۆخی سیاسی سووریا بن". د.عادل باخەوان دەڵێت: قسەی وەزیری دەرەوەی فەرەنسا بە تەواوی پێچەوانەی ئەمەیە ئەو بەدیاریکراوی وتی، "لە سووریادا کورد هاوپەیمانی فەرەنسایە لە جەنگ دژ بە تیرۆریزمدا و دەبێت لە سووریای نوێدا بە پرۆژەیەکی سیاسی پرسی کورد چارەسەربکرێت".

 

ئەوەی پێویستە بیزانیت: ئەمڕۆ هەینی، جان نۆویل بارۆ، وەزیری دەرەوەی فەرەنسا  لەگەڵ ئانالینا بیربوک وەزیری دەرەوەی ئەڵمانیا سەردانی سووریایان کرد و لەگەڵ ئەحمەد شەرع، فەرماندەی بەڕێوەبردنی سووریا کۆبوونەوە.