ئەمریکا ڕەتیدەکاتەوە بنکەی سەربازی نوێ لە کۆبانێ دابمەزرێنن

ئاڤا نیوز

 

ڕوانگەی سووری بۆ مافەکانی مرۆڤ بڵاویکردووەتەوە، لەماوەی سێ ڕۆژی ڕابردوودا هێزەکانی هاوپەیمانی نێودەوڵەتی جموجۆڵێکی زۆری سەربازییان لە ناوچە کوردییەکانی سووریا دەستپێکردووە و کاروانێکی گەورەی سەربازییان بەرەو کۆبانێ گواستەوە، لەبەرامبەردا گوتەبێژێک لە وەزارەتی بەرگری ئەمریکا دەڵێت: هیچ پلانێکمان نییە هێزەکانمان لە کۆبانێ جێگیر بکەین.

 

وێنە گەورەکە: نزیکەی مانگێکە لەگەڵ ڕووخانی دەسەڵاتی بەشار ئەسەد، هێرشی گرووپەکانی نزیک لە تورکیا بۆ سەر هێزەکانی سووریای دیموکرات (هەسەدە) دەستپێکردووە و تا ئێستاش بەردەوامە.

 

ڕاگەیێنراوی فەرمی: ڕوانگەی سووری بۆ مافەکانی مرۆڤ بڵاویکردەوە، لەماوەی سێ ڕۆژی ڕابردوودا چوار فڕۆکەی پڕ لە کەرەستەی سەربازی و چەک و 67 بارهەڵگر کە کەرەستەی سەربازی و ئامێری لێدانی چاڵ و کامێرای چاودێری و کەلوپەلی جیاوازی هەڵگرتبوو، گواستراونەتەوە بۆ کۆبانێ، ئەمەش بۆ دروستکردنی بنکەیەکی نوێیە لەو ناوچەیە.

 

زانیاریی زیاتر: بە گوێرەی ڕاگەیێنراوەکەی ڕوانگەی سووری، جموجۆڵەکانی ئەمریکا لە کۆبانێ لەگەڵ ڕێوشوێنی ئاسایشی تونددایە، چونکە لە چەند ڕۆژی ڕابردوودا لە بنکەی سەربازی خرابە جیر، فڕۆکەیەکی بێ فڕۆکەوان خرایە خوارەوە کە هەوڵی هێرشی دابوو بۆسەر بنکەکە.

 

لێدوانی فەرمی: تۆم کرۆسن، وتەبێژی وەزارەتی بەرگریی ئەمریکا )پنتاگۆن( بە ئاڤا میدیای راگەیاند، هێزەکانی ئەمریکا لەنێو شاری کۆبانێدا نین، هیچ پلانێکیشـان نییە بۆ جێگیرکردنی هێزەکانی ئەمریکا لە کۆبانێ.

 

لەلایەکی دیکەوە: فەرماندەیی ناوەندی سوپای ئەمریکا (سێنتکۆم) ئەمڕۆ هەینی لە هەژماری فەرمی خۆیان لەسەر تۆڕی کۆمەڵایەتی ئێکس، وێنەی زرێپۆشێکی جەنگی جۆری برادلی M2A3 داناوە لەگەڵیدا نووسیویانە "هاوپەیمانی نێودەوڵەتی ئاسایش و سەقامگیری ناوچەی ئۆپەراسیۆنە هاوبەشەکان دەپارێزێت، هێزەکانی هاوپەیمانان بە گرتنەبەری ڕێوشوێنی گونجاو بۆ هۆشداری مانەوە پێگەکانیان بەهێزتر دەکەن".