ئەردۆغان: لە ساڵی 2024 ئاستی هەناردەی تورکیا گەیشتە 262 ملیار دۆلار

ئاڤا نیوز

ڕەجەب تەیب ئەردۆغان، سەرۆککۆماری تورکیا ئاستی هەناردەی وڵاتەکەی بۆ ساڵی 2024 ڕاگەیاند، بە گوێرەی ئامارەکە، هەناردەی بەرهەمی تورکیا بۆ وڵاتان بەڕێژەی 2.5٪ زیادی کردووە و گەیشتووەتە 262 ملیار دۆلار.

 

وێنە گەورەکە: بەهۆی هەڵاوسانی ئابووری لەناوخۆی وڵاتەکەیدا تورکیا دەیەوێت پەیوەندییە ئابوورییەکانی لەناوچەکە و وڵاتانی دراوسێ گەشە پێبدات لەبوارەکانی بازرگانی و ساغکردنەوەی بەرهەمی وڵاتەکەی، بەگوێرەی ئامارەکانیش بێت عێراق لە ڕێزبەندی پێنجەمی ئەو وڵاتانە دایە کە زۆرترین بەرهەمی ئەو وڵاتەی هاوردە کردووە. 

 

لێدوانی فەرمی: ئەردۆغان لە ناوەندی کۆنگرەی هالیچ ئاماری ئاستی هەناردەی وڵاتەکەی ڕاگەیاند و گوتی: سەرەڕای بەربەستەکان لە مانگەکانی کۆتایی ساڵی 2024 ئاستی هەناردەی تورکیا، ژمارەیەکی پێوانەیی تۆمارکرد و گەیشتە 262 ملیار دۆلار، باسی لەوەش کرد دەیانەوێت ساڵی 2025 ئاستی هەناردە بگەیێنینە 390 ملیار دۆلار.

 

ژمارەکان وادەڵێن: لە مانگی دیسەمبەری ساڵی 2024، ئاستی هەناردەی تورکیا بە ڕێژەی 2.2٪ کە دەکاتە 23.5 ملیار دۆلار زیادیکردووە، بەمەش ئاستی پێوانەی ساڵی تۆمارکردووە.

 

- هاوکات ئاستی هاوردەکردنی کاڵا بە ڕێژەی 11.1٪ بەرزبووەتەوە کە دەکاتە 32.3 ملیار دۆلار.