ئەردۆغان: سەردەمی چەک  کۆتایی هاتووە و برایەتی لە تورکیا دەست پێدەکات

ئاڤا نیوز

 

سەرۆککۆماری تورکیا جەخت لەوە دەکاتەوە کە ئەو دووبەرەکییەی بەهۆی پەکەکەوە لە نێو تاکەکانی تورکیا دروست بووە، چاک دەکرێتەوە و پەکەکە لە ناوەندەکە دوور دەخرێتەوە. کۆتایی بە سەردەمی شەڕ و دوو بەرەکی دەهێنرێت و سەردەمی برایەتی لە تورکیا دەست پێدەکات.

 

وێنە گەورەکە: ئەم قسانەی ئەردۆغان لە کاتێکدایە کە هەوڵەکان بۆ خستنەگەڕی پرسی ئاشتەوایی کورد لە تورکیا بووەتە ڕۆژەڤی گەرمی میدیاکانی ئەو وڵاتە، سەردانە مێژووییەکانی شاندی ئیمراڵی و دەم پارتی و کۆبوونەوە نهێنییەکانیان لەگەڵ پارتە سیاسییەکان، هێندەی تر کوردانی لە پەرۆشی ئەنجامی ئەم هەوڵانە هێشتووەتەوە.

 

لێدوانی فەرمی: ڕەجەب تەیب ئەردۆغان، سەرۆککۆماری تورکیا لە کۆنگرەی حیزبەکەی لە سامسون جارێکی دیکە هەڕەشەی لە پەکەکە کرد و ڕایگەیاند:

- بۆ پەکەکە ڕێگەی سێیەم نییە، یان چەک دادەنێن، یان بە چەکەکانیانەوە دەنێژرێن.

- دەبێت هەمووان ئەوە قبووڵ بکەن، "سەردەمی چەک و تیرۆر و شەڕ کۆتایی هاتووە".

- ئەو بۆشاییەی ماوەی 40 ساڵە لە نێوان تاکەکانی تورکیا بەهۆی پەکەکەوە دروست بووە، بە برایەتی پڕ دەکرێتەوە.

- ئەو بەڵایەی 40 ساڵە بەرۆکی تورکیای گرتووە، بەم زووانە لێی ڕزگار دەبین.

- ناوچەکە بە کورد و تورک و عەرەبەوە چیدی هێزی هەڵگرتنی پلان و  شەڕ وئاڵۆزییەکانی پەکەکەی نەماوە.

- نە لە تورکیا و نە لە داهاتووی ناوچەکەدا شوێنێک بۆ پەکەکە و درێژکراوەکانی نەماوە.

- بەردەوام دەبین لە نووسینەوەی داستانی سەرکەوتنەکانمان لە ناوچەکەدا.