وەزارەتی نەوتی عێراق: هەناردەکردنەوەی نەوت بۆ سووریا پێویستی بە ڕێککەوتنی نوێ هەیە

ئاڤا نیوز

 

وەزارەتی نەوتی عێراق ڕایدەگەیێنێت، دەستپێکردنەوەی هەناردەکردنی نەوت بۆ سووریا پێویستی به واژۆکردنی ڕێککەوتنێکی نوێ له نێوان حکومەتی هەردوو وڵاتدا هەیه.

 

وێنە گەورەکە: بەهۆی گۆڕانکارییە سیاسی و ئەمنییەکانی سووریا لەدوای ڕووخانی ڕژێمەکەی بەشار ئەسەد، حکومەتی عێراق بڕیاریدا هەناردەکردنی نەوتی خاو بۆ سووریا ڕابگرێت.

 

ئەوەی لەوبارەیەوە دەگوترێت: ڕاپۆرتە هەواڵییەکان لە زاری سەرچاوەیەکی سیاسیی عێراقییەوە بڵاویانکردووەتەوە، حکومەتی بەغدا بڕیاریداوە لەماوەی چەند ڕۆژێکدا هەناردەکردنی نەوتی خاو بۆ سووریا دەستپێبکاتەوە بەپێی میکانیزمێکی نوێ کە رێکخراوتر و وردترە لەوەی پێشتر کاری پێدەکرا.

 

زانیاریی بەدەستهاتوو: سەرچاوەیەک لە وەزارەتی نەوت ئەوەی بۆ میدیای عێراق ئاشکرا کردووە، بابەتی دەستپێکردەنەوە و هەناردەکردنەوەی نەوت بۆ سووریا، دوورە لە ڕاستییەوە.

 

ئەو سەرچاوەیە کە ناوەکەی ئاشکرا نەکراوە، ئاماژە بۆ ئەوە دەکات، هەناردەکردنی نەوت لەنێوان وڵاتێک و وڵاتێکی دیکەدا پێویستی بە رێککەوتنێکی فەرمی و واژۆکراوی نێوان هەردوو وڵات هەیە.

 

ئەوەی پێویستە بیزانیت: پێش ئەوەی هەناردەکردنی بۆ سووریا ڕابگرێت، عێراق ڕۆژانە 33 هەزار بەرمیل نەوتی خاو و 120 هەزار تۆن نەوتی ڕەشی بۆ دیمەشق دابین دەکرد.

 

کاریگەریی و لێکەوتەکان: وەستانی هەناردەکردنی نەوتی عێراق بۆ سووریا قەیرانی سووتەمەنی لەناو خاکی سووریادا خراپتر کردووە، ئەمەش لەبەر ڕۆشنایی زیادبوونی کۆنترۆڵی هێزەکانی سووریای دیموکرات و هێزەکانی ئەمریکا بەسەر کێڵگە نەوتییەکانی سووریادا.