ئەم هەفتەیە سەرجەم جووتیاران پارەی گەنم وەردەگرن

ئاڤا نیوز

 

پرۆسەی دابەشکردنی پارەی گەنمی جووتیارانی هەرێمی کوردستان بەردەوامە و ئەم هەفتەیە سەرجەمیان پارەکە وەردەگرن و کۆتایی بە پرۆسەکە پێدێت. 

 

وێنە گەورەکە: نزیکەی 20 ڕۆژە دابەشکردنی دوایین گوژمەی پارەی گەنمی جووتیارانی هەرێمی کوردستان لە سایلۆکان بەردەوامە، ئەم هەفتەیە نزیکەی 600 جووتیار لە هەولێر و 300 جووتیاری دیکەش لە دهۆک پەرەکانیان وەردەگرن. هاوکات لە پارێزگای سلێمانیش کە تاوەکو ئێستا بەشێکی کەمی جووتیاران ماون، پارەکانیان وەردەگرن و پرۆسەکە تەواو دەبێت.

زانیاریی بەدەستهاتوو: دوایین گوژمەی پارەکە 125 ملیار و 852 ملیۆن و 997 هەزار دینار بوو، پشکی هەولێر  44 ملیار و 43 ملیۆن و 43 هەزار دینار بوو، لەو ماوەیەدا بەشێکی زۆری پارەکانیان خەرجکراوە، کە لە مانگی شەشی ساڵی 2024 ـەوە گەنمەکانیان ڕادەست کردبوو، هەرچەند بڕیار بوو لەگەڵ ڕادەستکردنی گەنمەکە پارەکە وەرگرن، بەڵام لەوەشیان جیاکاری کرا و ئەوەی جووتیارانی هەرێمی کوردستان لەماوەی شەش مانگدا گوژمە گوژمە نێردرا و ئەوەی عێراقیش ڕاستەوخۆ دابەشکرا.

 

لێدوانە فەرمیییەکان:

• میران بەختیار، بەڕێوەبەری سایلۆی هەولێر بە ئاڤای گوت، "سبەی یەکشەممە وەجبەیەکی دیکەی جووتیاران پارەکانیان وەردەگرن. لەسەر ئاستی پارێزگاکە نزیکەی 600 جووتیار ماون کە پارەکەیان خەرجنەکراوە، سبەی بەشێکیان پارەکە وەردەگرن و تاوەکو کۆتایی ئەم هەفتەیە سەرجەمیان پارەکانیان وەردەگرن."

 

• نازم ئەتروشی، بەڕێوەبەری بەبازاڕکردنی گەنمی دهۆک بە ئاڤای گوت: "سەرجەم جووتیاران چەکی پارەیان وەرگرتووە، بەڵام بەهۆی پشووەوە زیاتر لە 300 جووتیار ماون و پارەیان وەرنەگرتووە، پارەی پێویست لەبەردەستە و هەرکاتێک بچنە بانک، دەتوانن پارەکەیان ڕابکێشن".

 

• نەسرین ئەحمەد، بەڕێوەبەری سایلۆکانی پارێزگای سلێمانی بە ئاڤای گوت: "لەو سنوورە تەنیا 7%ی جووتیاران ماون پارە وەربگرن، بەهەمان شێوە چەک و پارەی ئەوانیش حازرە و هەر کاتێک سەردانیان بکەن دەتوانن وەری بگرن".

 

باکگراوند: حکومەتی فیدراڵ ئەمساڵ بڕی 598 ملیار دیناری دیاریکرد وەك شایستەی دارایی 700 هەزار تۆن گەنمی ڕادەستکراو بە سایلۆکان لەلایەن جووتیارانی هەرێمی کوردستانەوە، لەماوەی شەش مانگی ڕابردوودا بەچەند گوژمەیەک پارەکەی ڕەوانەی هەرێمی کوردستان کرد و 17ـی مانگی ڕابردوو دوایین گوژمەی خەرجکرا.