بەرپرسێکی پێشووی سووریا باسی دوایین ڕۆژەکانی کەوتنی دەسەڵاتی ئەسەد دەکات

ئاڤا نیوز

 

بەرپرسی پێشووی نووسینگەی ڕاگەیاندنی سەرۆکایەتیی سووریا لە چاوپێکەوتنێکدا چەند نهێنییەکی سەبارەت بە دوایین ڕۆژەکانی دەسەڵاتی بەشار ئەسەد ئاشكرا کرد و دەڵێت، "ڕووسیا ڕەتیکردووە هاوکاری بەشار ئەسەد بکات".

 

لێدوانی فەرمی: کامیل سەقر، بەڕێوەبەری پێشووی نووسینگەی ڕاگەیاندنی سەرۆکایەتیی سووریا لە پۆدکاستێکدا لەگەڵ کەناڵی 'ئەلعەرەبییە' ڕایگەیاند، لە دوای کەوتنی حەلەب ڕووسیا هیچ وەڵامێکی بۆ داواکارییەکانی بەشار ئەسەد نەبوو سەبارەت بە بەکارهێنانی بنکەی حەمیمیم بۆ گواستنەوەی هاوکارییە سەربازییەکانی ئێران بۆ سوپای سووریا. 

 

ئەوەی لەبارەیەوە دەگوترێت: سێ ڕۆژ پێش 8ی کانوونی یەکەمی ساڵی ڕابردوو، کە ڕۆژی کەوتنی دەسەڵاتی ئەسەد بوو لە سووریا، بەشار ئەسەد نەیتوانیوە پەیوەندیی بە ڤلادیمێر پووتین، سەرۆکی ڕووسیاوە بکات، هاوکات چوونی ئەسەد بۆ ڕووسیا چەند ڕۆژێک پێش ڕووخانی دەسەڵاتەکەی هیچ ئەنجامی نەبووە و بەدەستی بەتاڵەوە گەڕاوەتەوە سووریا. 

 

زانیاریی زیاتر: سەبارەت بە دۆخی دامەزراوە سەربازییەکان لەو کاتەدا سەقر دەڵێت: بارودۆخی دامەزراوە سەربازییەکان لە سووریا خراپ بووە،  سوپا توانای شەڕکردنی نەبووە، هاوکات دۆخی ئابووریی ئەو وڵاتە بەرەو خراپتر دەچوو.

 

لەلایەکی دیکە: ئەوەی پەیوەستە بە تورکیا و عێراقەوە بە گوتەی سەقر، حکومەتی عێراق لە 6ـی کانوونی یەکەمی 2024 بەرپرسانی سووریای ئاگادار کردووە کە تورکیا لە ئێستادا هەر جۆرە گفتوگۆیەک لەگەڵ ئەسەد ڕەتدەکاتەوە، ئەمەش لە کاتێکدابوو کە ئەلێکساندەر لاڤرێنتیڤ، نوێنەری سەرۆکی ڕووسیا لە سووریا، هەوڵیدابوو ئەسەد ڕازی بکات لەگەڵ ڕەجەب تەیب ئەردۆغان سەرۆککۆماری تورکیا کۆببێتەوە، بەڵام ئەسەد ئامادە نەبووە، ئەمەش ڕووسیای نیگەران کردووە. 

 

ئەوەی پێویستە بیزانیت:  "ئێران دڵنیایی تەواوی نەبوو بۆ ڕەوانەکردنی فڕۆکەی سەربازیی بۆ بنکەی حەمیمیم بۆ هاوکاری سوپای سووریا بە بەکارهێنانی ئاسمانی عێراق، سووریاش لەمە ئاگادار کرابوویەوە، هاوکات ئەمریکییەکانیش هەڕەشەی خستنەخوارەوەی فڕۆکەیەکی ئێرانیان کردبوو، بەو هۆیەوە فڕۆکەکە ناچار بوو بگەڕێتەوە ئێران".  کامیل سەقر وا دەڵێت.