مووچەی مانگی 12 خانەنشینان و زیندانیانی سیاسی دابەش دەکرێت

ئاڤا نیوز 

 

دەستەی خانەنشینی عێراق پەیامی دڵنیایی دەداتە خانەنشینی مەدەنی و سەربازی و چاودێری کۆمەڵایەتی کە مووچەکانیان پارێزراوە و دەست کراوە بە خەرجکردنی مووچەی مانگی 12 و ئاماژەی بەوە داوە کە بەهۆی پشووەکانی سەری ساڵ دابەشکردنەکە دواخراوە.

 

وێنە گەورەکە: مووچەی مانگی 12ی ساڵی ڕابردووی خانەنشینانی مەدەنی و سەربازیی عێراق ماوەی چەند ڕۆژێک دواکەتووە و بەپێی دەستەی خانەنشینی عێراقیش بەهۆی پشووەکانی سەری ساڵ بووە، هاوکات دەستەکە دەشڵێت، "کەمی لە پارەی نەختینەیی  دا نییە".

 

ڕاگەیێنراوی فەرمی: دەستەی خانەنشینی نیشتیمانیی عێراق ڕایگەیاند:  بەهۆی پشووەوە لە ڕۆژی 02-01-2025 بانکەکان نەیانتوانی ڕێکارەکانی خەرجکردنی مووچەی مانگی 12 بکەن و داوا لە هەموو بانکەکان دەکەن ئەمڕۆ یەکەشەممە 05-01-2025 دەست بکەن بە دابەشکردنی مووچەی خانەنشینان و زیندانیانی سیاسی.

 

ئەوەی پێویستە بیزانیت: بەشێکی هاونیشتمانیانی هەرێمی کوردستان خانەنشینی حکومەتی عێراقن و بەشێکیان زیندانی سیاسی ڕژێمی پێشوون و مانگانە مووچەکانیان لە بەغداوە وەردەگرن.