زانیاری لەبارەی مووچەی مانگەکانی 12 و یەک

ئاڤا نیوز

 

وەزارەتی دارایی و ئابووریی هەرێمی کوردستان ڕایدەگەیێنێ، تەواوی 441 ملیار دینارەکەی بەغدایان وەرگرتووە و بۆ مووچەی مانگی 11 خەرج دەکرێت، لەگەڵ بە‌غداش هەوڵەکان بۆ یەکلاکردنەوەی مووچەی مانگی 12 چڕ دەکەنەوە، تەیف سامیش داوا دەکات واز لە مووچەی مانگی 12 بێنن و لیستی مووچەی مانگی یەکیان بۆ بنێرن.

چیرۆکی سەرەکی: ئەمڕۆ یەکشەممە دەست بە دابەشکردنی مووچەی مانگی 11 کرا و لە سێ ڕۆژی داهاتوودا تەواو دەبێت. بەهۆی ئەوەی وەزارەتی دارایی عێراقیش لە مانگەکانی ڕابردوودا پارەی بە کەموکوڕی ناردووە، چارەنووسی مووچەی مانگی 12 دیارنییە.

ئەوەی پێویستە بیزانیت: هەر ئەمڕۆ یەکشەممە وەزارەتی دارایی و ئابووریی هەرێمی کوردستانیش لەبارەی گەیشتنی 441 ملیار دینارەکەی بەغدا  ڕوونکردنەوەی دا، بەپرسێکی وەزارەتەکە بە ئاڤا نیوزی ڕاگەیاند: وەزارەتی دارایی عێراق ڕۆژی 31-12-2024 بڕی 441 ملیار و 494 ملیۆن و 549 هەزار دیناری خستووەتە سەر هەژماری هەرێمی کوردستان، ئەمڕۆ یەکشەممەش لەگەڵ دەستپێکردنەوەی دەوامی فەرمی، تەواوی پارەکەیان لە بانک ڕاکێشاوە، بۆ مووچەی مانگی یانزەش خەرج دەکرێت و کورتهێنانەکەی پێ پڕدەکرێتەوە".

زانیاریی تایبەت: لەبارەی چارەنووسی مووچەی مانگی 12 ئاڤا زانیویەتی، تەیف سامی، وەزیری دارایی عێراق وتوویەتی ئەو بڕە پارەی ناردوویەتی واتا 441 ملیارەکە هی مانگی 12 یە نەوەک تەواوکاری مانگی 11. گوتووشیەتی حیساباتی ساڵی 2024 داخراوە و دەبێت لەمەودوا گفتوگۆ لەبارەی مووچەی مانگی یەک بکرێت و داوای کردووە لیستی مووچەیان بۆ بنێرن. بەڵام وەزارەتی دارایی کوردستان دەڵێ بەمە ڕازی نین، ئەرکی حکومەتی عێراقە تەواوی پارەی مووچە بنێرێت و گفتوگۆکان لەبارەی مووچەی مانگی 12 چڕ دەکەنەوە.

هەنگاوی داهاتوو: بۆ مووچەی ئەمساڵ دەبێت هەردوو حکومەتی کوردستان و عێراق ڕێککەوتنێکی نوێ بکەن، بۆ ئەوەی یەکلابکرێتەوە لەسەر چ بنەمایەک و چۆن بنێردرێت، واتە چەند دەنێرێت و پابەندییەکانی هەرێمی کوردستان چی دەبن؟