کەسێک لەڕێگەی تیکتۆکەوە فێل لە دەیان هاونیشتمانی دەکات

ئاڤا نیوز

 

کەسێک لە ڕێگەی تیکتۆکەوە چەند کارتۆنێک بە قەبارە و نرخی جیاواز بە هاونیشتمانیان دەفرۆشێت و ئاڤا میدیا بەدواداچوون بۆ جۆری کارەکەی دەکات.

 

چیرۆکی سەرەکی: پەیجێک لە تیکتۆک ڕێکلام بۆ چەند قەبارەیەکی جیاواز لە کارتۆنی کۆمپانیایێک دەکات، هاوکات بە نرخی جیاواز بە هاونیشتمانیان دەفرۆشێت و گوایە کەلوپی کۆگاکانی کۆمپانیاکەی تێدایە، بەشێکشیان وەک مۆبایل، ئایپاد و شتی گرانبەها نیشان دەدرێن.

 

لێدوانی فەرمی: هاونیشتمانییەک لە هەولێر بە ئاڤا میدیای ڕاگەیاند: کارتۆنێکیان بە 30 هەزار دینار لە پەیجەکە کڕیوە، تاوەکو شتی کوالێتییان دەستکەوێت، بەڵام کارتۆنەکە جگە لە چەند پارچە پلاستیکێک، هیچ شتێکی دیکەی تێدا نەبووە، دوای ئەوەش پەیوەندیی بە خاوەنی پەیجەکەوە دەکەن و وەڵامیان ناداتەوە، لە تیکتۆکیش کۆمێنتەکانیان دەسڕێتەوە و بلۆکیان دەکات.

 

لەلایەکی دیکەوە: نەوزاد شێخ کامیل، بەڕێوەبەری گشتیی بازرگانیی هەرێمی کوردستان بە ئاڤا میدیای ڕاگەیاند: کارەکە وەک قومار وایە و ڕێگەپێدراو نییە، "لەڕێگەی لیژنەکانمانەوە بەدواداچوون بۆ حاڵەتەکە دەکەین و بەپێی یاسا مامەڵە لەگەڵ فرۆشیاری ئەو کارتۆنانە دەکەین".

ئەوەی پێویستە بیزانیت: بەڕێوبەرایەتیی گشتیی بازرگانیی هەرێمی کوردستان، مۆڵەت بەو شتانە نادات کە لە ڕێگەی تیکتۆک و تۆڕە کۆمەڵایەتییەکانەوە دەفڕۆشرێن، هەر بەرهەم و کاڵایەک بێتە هەرێمی کوردستانەوە پێویستە مۆڵەتی بازرگانی و ڕێگەپێدانی هەبێت.