ئەمریکا بۆ ئاڤا: دەبێت عێراق کۆنترۆڵی هەموو گرووپە چەکدارەکان بکات

ئاڤا نیوز

 

ئەمریکا داوا لە عێراق دەکات کۆنترۆڵی گرووپە چەکدارەکان لە وڵاتەکەی بکات و ئاماژە بەوەش دەکات بەردەوام دەبن لە هاوکاریکردنی عێراق لە ڕووبەڕووبوونەوەی تیرۆردا.

 

وێنە گەورەکە: بوونی گرووپە چەکدارەکان لە عێراق بووەتە مەترسی بۆ سەر وڵاتەکە، هەروەک چاوەڕوان دەکرێت ئیدارەی نوێی ترەمپ پێگەکانی ئەو گرووپانە لە عێراق لە ساڵی 2025 بکاتە ئامانج.

 

لێدوانی فەرمی: ماتیۆ میلەر، وتەبێژی وەزارەتی دەرەوەی ئەمریکا بە ئاڤا میدیای ڕاگەیاند:

- ئەمەریکا بە ڕوونی ڕایگەیاندووە، دەوڵەتی عێراق دەبێ کۆنترۆڵی هەموو ئەو گرووپە چەکدارانە بکات کە لە سەر خاکەکەی چالاکی ئەنجام دەدەن.   

- ئەمریکا پشتگیری تەواوەتی لە هەوڵەکانی حکومەتی عێراق دەکات بۆ بەهێزکردنی سەقامگیری و سەروەری وڵاتەکەی.

- داعش هێشتا هەڕەشەیەکی بەرچاوە بۆ سەر ناوچەکە و ئەمریکا و عێراق پابەندن بە بەردەوامیدان بە کارکردن بۆ دەستەبەرکردنی شکستپێهێنانی داعش.

- سوپای ئەمریکا بەردەوام دەبێت لە مەشق و ڕاهێنان و کارکردن لەگەڵ هێزە ئەمنییەکانی عێراق کە بەشێکی سەرەکییە لە ڕێککەوتنی چوارچێوەی ستراتیژی ئەمریکا و عێراق.

 

ئەوەی پێویستە بیزانیت: فشارەکان لەسەر حکومەتی عێراق زیادیان کردووە کە دەبێت گرووپە چەکدارەکانی نزیک لە ئێران نەمێنن یاخود بخرێنە ناو سووپای عێراق.

 

ئەمەش بزانە: هەر لەبارەی گرووپە چەکدارەکانی عێراق، بڕیار وایە ڕۆژی چوارشەممە محەممەد شیاع سوودانی، سەرۆکوەزیرانی عێراق سەردانی تاران بکات و لەگەڵ بەرپرسانی باڵای ئەو وڵاتەدا کۆببێتەوە.