عێراق بۆ بەدەستهێنانی غاز گرێبەست لەگەڵ کۆمپانیایەکی ئیماراتی دەکات

ئاڤا نیوز

عێراق بۆ بەدەستهێنانی 100 ملیۆن پێ سێجا غاز، بەمەبەستی سوود وەرگرتن لە کارپێکردنی وێستگەکانی کارەبادا، گرێبەست لەگەڵ کۆمپانیایەکی ئیماراتی واژۆ دەکات.

 

بۆچی گرنگە: عێراق لە ڕێگەی واژۆکردنی ئەو گرێبەستانە لەگەڵ کۆمپانیاکانی کەرتی تایبەت هەوڵی بەدەستخستنی بڕێکی زیاتر لە غاز دەدات بۆ کارپێکردنی وێستگەکانی کارەبا و باشتکردنی ڕەوشی کارەبا لە شارەکانی عێراق و کەمکردنەوەی بڕی غازی هاوردەکراو لە ئێران.

 

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق ڕایگەیاند: سێشەممە 7-1-2024، سوودانی سەرۆکایەتی کۆبوونەوەیەکی لەگەڵ نوێنەرانی کۆمپانیای نەوتی هیلال بە ئامادەبوونی وەزیرانی نەوت و کارەبا کرد و لە میانی کۆبوونەوەکەدا پلانەکانی حکومەت بۆ بەردەوامبوون لە وەبەرهێنانی غاز بە هاوبەشی لەگەڵ کەرتی تایبەت تاوتوێ کرا.

 

- سەرۆکوەزیران وەزارەتی کارەبای ڕاسپارد بەردەوام بێت لە گرێبەستکردن لەگەڵ کۆمپانیای هیلال بۆ بەدەستهێنانی (100) ملیۆن پێ سێجا غازی ستاندارد، بۆ ئەوەی سوودی لێوەربگرێت لە کارپێکردنی وێستگەکانی کارەبادا.

- وەزارەتی نەوتیشی ڕاسپارد، لەچوارچێوەی پلانێک و ماوەیەکی دیاریکراودا پەلە بکات بۆ لابردنی هەموو ئاستەنگەکانی بەردەم وەبەرهێنانی کۆمپانیای هیلال بۆ نەوت و غاز لەکێڵگەی خەشم ئەحمەر - ئینجانە کە دەکەوێتە پارێزگای دیالە.