ناوەڕۆکی کۆبوونەوەی مەسرور بارزانی و ڕەجەب تەیب ئەردۆغان

ئاڤا نیوز

 

سەرۆکوەزیران مەسرور بارزانی سەردانی ئەنقەرەی پایتەختی تورکیا کردوو لەگەڵ ڕەجەب تەیب ئەردۆغان، سەرۆککۆماری تورکیا کۆبووەوە، لە کۆبوونەوەکەدا تاوتوێی دۆخی ناوچەکە و نەهێشتنی ئاستەنگییەکانی بەردەم هەناردەکردنەوەی نەوتی هەرێمی کوردستان کراوە. 

 

وێنە گەورەکە: ئەمڕۆ سێشەممە، دوای سەردانە فەرمییەکەی بۆ تورکیا، سەرۆکوەزیران بارزانی لەگەڵ هاکان فیدان، وەزیری دەرەوەی تورکیا و ڕەجەب تەیب ئەردۆغان سەرۆککۆماری تورکیا کۆبووەوە. 

 

ڕاگەیێنراوی فەرمی: لە ڕاگەیێنراوەکەی حکومەتی هەرێمی کوردستاندا هاتووە، سەرۆکوەزیران بارزانی و سەرککۆماری تورکیا لەسەر بەهێزکردنی پەیوەندی دوو لایەنەی نێوانیان و دوایین پەرسەندن و پێشهاتەکانی عێراق و ناوچەکە و سووریا قسەیان کردووە. 

 

زانیاریی زیاتر: لە بەشێکی دیکەی کۆبوونەوەکەدا جەخت لەسەر گرنگی چارەسەری کێشەکانی نێوان هەولێر و بەغدا کراوەتەوە لە ڕێگەی دانیشتن و دیالۆگی ئاشتییانەوە، هاوکات باسیش لە نەهێشتنی ئاستەنگییەکانی بەردەم دووبارە هەناردە کردنەوەی نەوتی هەرێمی کوردستان کراوەتەوە.

 

لەلایەکی دیکەوە: سەرۆکایەتیی کۆماری تورکیا ڕاگەیێنراویک لە بارەی سەردانەکەی سەرۆکوەزیران بارزانی ڕایگەیاند: ڕەجەب تەیب ئەردۆغان، سەرۆککۆماری تورکیا لە کۆبوونەوەکەیدا لەگەڵ سەرۆکوەزیران بارزانی، باسی لە دۆخی سووریا و سەقامگیری عیراق و تورکیا کردووەتەوە، هاوکات ئەردۆغان باسی لە گرنگی پڕۆژەی ڕێگەی گەشەپێدان و ئەو جۆرە پڕۆژانە کردووە کە هۆکارێکن بۆ سەقامگیری و ئاشتەوایی لە ناوچەکە.