ئاڤا بەدواداچوون بۆ کێشەی ئەو فەرمانبەرانە دەکات کە لە نووسینگەی شۆفێری کار دەکەن

ئاڤا نیوز 

 

بڕیارێکی وەزارەتی ناوخۆ لەبارەی قەدەغەکردنی کارکردنی فەرمانبەران لە نووسینگەکانی شۆفێری، نیگەرانی بەشێک لە فەرمانبەرانی لێ دەکەوێتەوە، وەزارەتی ناوخۆش دەڵێت، 'دوای ڕێنمایەکە ڕێگە بە هیچ فەرمانبەرێک نادرێت کار بکات'.

 

وێنە گەورەکە: ژمارەیەک فەرمانبەر کە لە نووسینگەکانی شۆفێری کار دەکەن، دوای بڕیارێکی وەزارەتی ناوخۆ بۆ قەدەغەکردنی کارکردنیان لە نووسینگەکانی شۆفێری ناڕازین و دوایان لە ئاڤا کرد، کە بەداداچوون بۆ کێشەکایان بکات، دەنگیان بە لایەنی پەیوەندیدار بگەیەنێت.

 

لێدوانی فەرمی: قەیس، خاوەنی یەكێکە لە نووسینگەکانی شۆفێرییە و مامۆستایە، بە ئاڤا میدیای ڕاگەیاند: وەزارەتی ناوخۆ بڕیاری قەدەغەی کارکردنی فەرمانبەری لە نووسینگەکانی فێربوونی داوە، ئەی چارەنووسی ئێمە چی لێ دێت؟. 

 

لە لایەکی دیکەوە: د.هێمن میرانی، بەڕێوبەری گشتیی دیوانی وەزارەتی ناوخۆی حکومەتی هەرێمی کوردستان، بە ئاڤا میدیای ڕاگەیاند: هەر فەرمانبەرێک پێش دەرچوونی ڕێنمایی ژمارە 12ی ساڵی 2024 لە نووسینگەکانی شۆفێری وەک ڕاهێنەر و فەرمانبەر کاری کردبێت، بە گوێرەی ئەم ڕوونکردنەوەیە دەتوانێت بەردەوام بێت، بە گوێرەی ئەم خاڵانەی خوارەوە:-

 

1-ئەو فەرمانبەرانەی پێش دەرچوونی ڕێنماییەکەی وەزارەتی ناوخۆ، وەک ڕاهێنەر، یان مامۆستا کاریان لە نووسینگەکانی شۆفێری کردووە، بەو مەرجەی لە مانگێک دا زیاتر لە 100 کاتژمێر کار نەکات و دوای دەوامی خۆی بێت، ڕێگەمان پێداون بەردەوام بن.

 

2-دەبێت ڕەزمەندی فەرمانگەکەی بۆ بەڕێوەبەرایەتی هاتووچۆ ببات.

 

3-فەرمانبەرەکە دەبێت تەمەنی لەنێوان 20 بۆ 63 ساڵی بێت، ئەگەر تەمەنی لەسەروی تەمەنی خانەنشینی بێت، دەبێت ڕاپۆرتی پزیشکی هەبێت بۆ ئەوەی بیسەلـمێنێت بۆ ئەو کارە گونجاوە.

 

4- هەر کەسێک بە شێوەی یاسایی لە هەرێمی کوردستان بژی و ئیقامەی فەرمی هەبێت، پێش دەرچوونی ڕێنماییەکە لە نووسینگەی شۆفێری کاری کردبێت، ڕێگەی پێ دەدرێت بەردەوام بێت.

 

هێمن میرانی گوتیشی: ئەو خاڵانەی باسکران، تەنیا ئەو فەرمانبەرانە دەگرێتەوە کە پێش دەرچوونی ڕێنماییەکە لەو بوارە کاریان کردووە، بەڵام دوای دەرچوونی ڕێنماییەکە ڕێگە بە هیچ فەرمانبەرێک نادرێت بیەوێ لەو بوارە کار بکات، ئەمەش لە پێناوی دۆزینەوەی دەرفەتی کارە بۆ خەڵک.

 

ئەوەی پیویستە بیزانیت: نابێت ئەو کەسەی لە نووسینگەی شۆفێری کار دەکات، بەڕێوەبەری نووسینگەکە بێت، چونکە دەبێت بە بەردەوامی لەو بوارە کار بکات، بەڵام ئاساییە خاوەنی شوێنەکە بێت و فەرمانبەر بێت.