مەسعود پزیشکیان: جەختمان لەسەر فراوانکردنی پەیوەندییەکانمان لەگەڵ عێراق کردەوە

ئاڤا نیوز 

 

سەرۆککۆماری ئێران ڕایگەیاند، پەیوەندییەکانی نێوان تاران و بەغدا لە باشترین قۆناغدایە و کاری زیاتریش بۆ پەرەپێدانی ئەو پەیوەندییانە دەکەن، جەختیشیکردەوە کە خاڵی نیگەرانی هاوبەشیان لەگەڵ عێراق مەترسی سەرهەڵدانەوەی تیرۆرە لە ناوچەکەدا.

 

ئەوەی پێویستە بیزانیت: سەرلەبەیانی ئەمڕۆ چوارشەممە، محەممەد شیاع سوودانی، سەرۆکوەزیرانی عێراق بەسەرۆکایەتی شاندێکی باڵا گەیشتە تاران و لە کۆشکی سەعدئاباد لە تاران لەلایەن مەسعود پزیشکیان، سەرۆککۆماری ئێران پێشوازی لێکرا، دواتریش کۆبوونەوەی فراوانی شاندی هەردوو وڵات بەڕێوەچوو.

 

لێدوانی فەرمی: دوای کۆتاییهاتنی کۆبوونەوەکە، مەسعود پزیشکیان، سەرۆککۆماری ئێران لە کۆنفرانسێکی ڕۆژنامەنووسیدا ئاماژەی بەوەكرد، عێراق هاوبەشێکی ستراتیژیی وڵاتەکەیەتیی و بە هەموو شێوەیەک هاوکاری سوودانی دەبێت بۆ ئەوەی وڵاتەکەی زیاتر پڕ لە ئاسایش و گەشەپێدان و خۆشگوزەرانی بێت.

 

بەشێک لە قسەکانی مەسعود پزیشکیان لە کۆنفرانسەکەیدا:

* لەگەڵ سەرۆکوەزیران باسمان لە نیگەرانییە هاوبەشەکانی ئێران و عێراق کرد لەبارەی (پێشهاتەکانی سووریا، ئارامی و یەکێتی سووریا، ڕووبەڕووبوونەوەی گرووپە تیرۆرستییەکان، پێویستی دەرچوونی ئیسرائیل لەو ناوچانەی داگیریکردوون، گرنگیدان بە پاراستنی هەستی ئاینیی و بەتایبەت شوێنە پیرۆزەکانی شیعە).

* بۆ گریمانەی سەرهەڵدانەوەی تیرۆر، پێویستمان بە وریایی و کاری هاوبەشی نێوان هەردوو وڵات هەیە، ئەو پێشهاتە بیرمان دەخاتەوە کە زیاتر لە هەرکاتێکی دیکە دەبێت هەماهەنگی لەنێوانماندا هەبێت.

* گفتوگۆی گشتگیرمان لەبارەی جێبەجێکردنی ڕێککەوتنە ئەمنییە هاوبەشەکانمان کرد، هەروەها باسمان لە لێکتێگەیشتنەکانمان کرد لەبوارەکانی بازرگانی، دەروازەکان، وەبەرهێنان و زۆر بواری دیکە، جەختمانکردەوە لە پەلەکردن لە جێبەجێکردنیان و لابردنی ئاستەنگییەکانی بەردەمیان.