سوودانی لە تاران: سەقامگیری ناوچەکە خاڵێکی گرنگی پەیوەندییە دووقۆڵییەکانمانە

ئاڤا نیوز

 

سەرۆکوەزیرانی عێراق لە میانەی کۆنگرەی هاوبەشی ڕۆژنامەوانی لەگەڵ سەرۆککۆماری ئێران ڕایگەیاند، هەوڵدەدەین پەیوەندییەکانمان لەگەڵ ئێران بەرەوپێش ببەین، سەقامگیری ناوچەکە خاڵێکی گرنگی پەیوەندییە دوو قۆڵییەکانمانە و لە ماوەی داهاتوودا کۆڕبەندێکی گەورە لەبارەی دۆخی ناوچەکە لە بەغدا دەبەستین.

 

وێنە گەورەکە: سەرلەبەیانی ئەمڕۆ محەممەد شیاع سوودانی، سەرۆکوەزیرانی عێراق بە یاوەریی شاندێکی باڵا و لە چوارچێوەی سەردانێکی فەرمی گەیشتە کۆماری ئیسلامی ئێران و لەگەڵ مەسعود پزیشکیان، سەرۆککۆماری ئێران کۆبووەوە و دواتر کۆنگرەیەکی ڕۆژنامەوانییان ئەنجامدا.

 

لێدوانی فەرمی: محەممەد شیاع سوودانی، سەرۆکوەزیرانی عێراق لە کۆنگرە ڕۆژنامەوانییەکە وتی: 

•   ڕێککەوتین لەسەر گەشەپێدان لە هاوبەشە بازرگانییەکان و ڕەخساندنی سەقامگیری ئەمنی لە ناوچەکە.
•  لێکتێگەیشتنی ئەرێنیمان لەبارەی غاز و کارەبا لەگەڵ ئێران هەیە، لەبارەی بەستنی ڕێگەی ئاسنینی بەسرە و شەلەمچە گفتوگۆی ئەرێنیمان هەبوو.
•  هەڵوێستمان لەسەر ڕووداوەکانی ناوچەکە و کۆمەڵکوژی غەززە نەگۆڕە، تاکە ڕێگە بۆ سەقامگیری ناوچەکە ڕاگرتنی شەڕە لە غەززە.
•    پشتگیری بەردەوامبوونی ئاگربەستەکەی لوبنان دەکەین و ئامادەین هاوکاربین لە ئاوەدانکردنەوەی لوبنان.
•    سەقامگیریی سووریا کلیلی سەقامگیریی ناوچەکەیە و پێویستە یەکپارچەیی وڵاتەکە بپارێزرێت، ڕێز لە ئیرادەی خەڵکی سووریا دەگرین و عێراق ئامادەی هاوکارییە بۆ ڕاگوزەری سیستمی سیاسیی لەو وڵاتە.
•  لەماوەی داهاتوو کۆڕبەندێکی گەورە لەبارەی دۆخی ناوچەکە لە بەغدا دەبەستین، عێراق پابەندی سیاسەتێکی ڕوونە و ڕێگەنادات سەروەری خاکەکەی بکەوێتە مەترسییەوە.

 

زانیاریی زیاتر: وەزیری دەرەوە، کارەبا، بازرگانی، ڕاوێژکاری ئاسایشی نەتەوەیی، ڕاوێژکاری سەرۆکوەزیران و بەڕێوەبەری گشتیی پرۆژەکانی نەوت لە وەزارەتی نەوتی عێراقی یاوەریی سوودانی دەکەن لە سەردانەکەی بۆ ئێران.