وەزیری دەرەوەی حکومەتی کاتیی سووریا سەردانی بەغدا دەکات

ئاڤا نیوز 

 

وەزیری دەرەوەی حکومەتی ڕاگوزەریی سووریا لە سەرەتای هەفتەی داهاتوودا سەردانی عێراق دەکات و لەگەڵ فوئاد حوسێن، وەزیری دەرەوەی عێراق و محەممەد شیاع سوودانی، سەرۆکوەزیرانی عێراق کۆ دەبێتەوە.

 

وێنە گەورەکە: دوای ڕووخانی دەسەڵاتی بەشار ئەسەد لەلایەن ئۆپۆزیسیۆنی چەکداریی سووریا، حکومەتی نوێی سووریا پەیامی دڵنیایی دا هەموو وڵاتان نابنە مەترسی بۆ سەر هیچ لایەک و نیازی خۆی بۆ گرێدانی پەیوەندیی لەگەڵ سەرجەم وڵاتان نیشان دا.

 

زانیاریی بەدەستهاتوو: چەند سەرچاوەیەکی ئاگادار بۆ ئاڤا میدیا ئاشکرایان کردووە، ئەسعەد شیبانی، وەزیری دەرەوەی سووریا لەگەڵ بەرپرسانی عێراق تاوتوێی ئاسایشی سنووری هاوبەش، دووبارە کردنەوەی دەروازە سنوورییەکانی نێوانیان، دەستپێکردنەوەی گەشتە ئاسمانییەکانیان، دەستپێکردنەوەی چالاکییە ئابووری و بازرگانییەکانی نێوانیان دەکەن.

 

هاوکات سەرچاوەکان باسیشیان لەوە کرد، پرسی بوونی داعش لە خاکی سووریا تاوتوێ دەکەن و عێراق گرنگییەکەی زۆر بەم پرسە دەدات.

 

ئەوەی پێویستە بیزانیت: لە چەند ڕۆژی ڕابردوودا ئەسعەد شیبانی سەردانی چەند وڵاتێکی عەرەبیی کرد لەوانەش، سعوودیە، قەتەر وئیمارات، چەندین پرسی سیاسی و ئەمنی و داهاتووی سووریا تاوتوێ کران.

 

باکگراوەند: ڕۆژی 26-12-2024، شاندێکی عێراق بە سەرۆکایەتیی حەمید شەتری، سەرۆکی دەزگای هەواڵگریی عێراق گەیشتە دیمەشق و لەگەڵ ئەحمەد شەرع و بەرپرسانی ئیدارەی نوێی سووریا کۆبووەوە و پرسی ئەمنی تەوەری سەرەکیی گفتوگۆکانیان بوون.