سێ سەرۆکایەتیی عێراق تاوتوێی ئامادەکارییەکان بۆ هەڵبژاردن دەکەن

ئاڤا نیوز

 

سێ سەرۆکایەتیی عێراق تاوتوێی ئامادەکارییەکان بۆ بەڕێوەچوونی هەڵبژاردنی پەرلەمان لە ساڵی 2025 و پێویستی دابینکردنی پێداویستییە لۆجستی و تەکنیکییەکان بۆ کۆمیسیۆنی باڵای سەربەخۆی هەڵبژاردنەکان دەکەن.

 

چیرۆکی سەرەکی: ئێوارەی ڕۆژی چوارشەممە 8-1-2025، د. عەبدوللـەتیف ڕەشید، سەرۆککۆمار، مەحموود مەشهەدانی، سەرۆکی ئەنجوومەنی نوێنەران و فایەق زێدان، سەرۆکی ئەنجوومەنی باڵای دادوەری لە کۆشکی بەغدا کۆبوونەوە.

 

ڕاگەیێراوی فەرمی: سەرۆکایەتی کۆماری عێراق ڕایگەیاند:

 

- لە کۆبوونەوەکە تاوتوێی ئامادەکارییەکان بۆ بەڕێوەچوونی هەڵبژاردنی پەرلەمانی لە ساڵی 2025 و پێویستی دابینکردنی پێداویستییە لۆجستی و تەکنیکییەکان بۆ کۆمیسیۆنی باڵای سەربەخۆی هەڵبژاردنەکان کرا.

 

- لە بابەتی داراییدا، پرسی نەختینەیی و پارەدارکردنی وەزارەت و پارێزگاکان لە بودجەی وەبەرهێنان و بودجەی گەشەپێدانی هەرێمەکان تاوتوێ کرا، هاوکات پێویستی جێبەجێکردنی ئەرکە داراییەکانی دامەزراوە و وەزارەتەکان و پەیڕەوکردنی پێوەرەکانی چاودێری و وردبینی لە خەرجکردنەکان بۆ پاراستنی پارەی گشتی و سنووردارکردنی گەندەڵی، گفتوگۆی لەبارەوە کرا.

 

- جەخت لەسەر پێویستی پاڵپشتیکردنی حکومەت کرایەوە لە تەواوکردنی بڕگەکانی بەرنامەکەی لەڕێگەی باشترکردنی خزمەتگوزارییەکان و باشترکردنی باری گوزەرانی هاووڵاتیان و پاڵپشتیکردنی ئابووریی عێراق و هاندانی کەرتی تایبەت بەشێوەیەک کە هاوکار بێت لە بەدیهێنانی پەرەپێدانی هەمەلایەنە.

 

ئەوەی پێویستە بیزانیت: ئەو کۆبوونەوەیە لە کاتێکدایە کە محەممەد شیاع سوودانی، سەرۆکوەزیرانی عێراق بە سەردانێکی فەرمی لە ئێرانە و لە میانی سەردانەکەی لەگەڵ سەرۆککۆمار و سەرۆکی پەرلەمان و ڕێبەری باڵای کۆماری ئیسلامی ئێران کۆبووەوە.