ئاگرەکەی تەکساس لە کۆنتڕۆڵ دەرچووە و دامەزراوەیەکی چەکی ناوەکی لەکار دەخات

ئاڤا نیوز 

چەند ڕۆژێکە ئاگر لە دارستانەکانی ویلایەتی تەکساسی ئەمریکا کەوتووەتەوە و چەندین زەرەر و زیانی هەبووە. 

 

ئەوەی ئێستا ڕوودەدات: بەرپرسانی ئیداریی ویلایەتی تەکساس ڕایانگەیاند، ئەو ئاگرەی لە ناوچەی پانهاندل لە ویلایەتی تەکساس کەوتووەوە لە کۆنتڕۆڵ دەرچووە، کارەبای ناوچەکە پچڕاوە و دامەزراوەکانی چەکی ناوەکی داخراون، بای بەهێز و گیای وشک هۆکاری تەشەنەسەندی ئاگرەکەن. 

 

زیانە سەرەکییەکان: سەدان کەس لە دانیشتووانی ئەو ناوچەیە ئاوارە بوون، دامەزراوەی بانتکس کە 500 کیلۆمەتر لە باکووری دالاس دوورە بەهۆی ئاگرەکەوە کارەکانی وەستاون و کارمەندەکانی دوورخراونەتەوە، بەهۆی ئاگرەکەشەوە سێ هەزار و 370 کیلۆمەتر زەوی سووتاوە. 

 

زانیاریی زیاتر: تاوەکو ئێستا تەنیا لە 3%ـی ئاگرەکە کۆنتڕۆڵ کراوە.