دەوڵەتی یاسا و عەزم کشانەوەی کورد لە پرۆسەی سیاسی ڕەتدەکەنەوە

ئاڤا نیوز

 

هاوپەیمانیی دەوڵەتی یاسا بە سەرۆکایەتیی نووری مالیکی و هاوپەیمانیی عەزم بەسەرۆکایەتیی خەمیس خەنجەر کشانەوەی کورد لە پرۆسەی سیاسی عێراق ڕەتدەکەنەوە. هاوکات هاوپەیمانی عەزم داوای چارەسەری خێرا بۆ کێشەکانی نێوان بەغدا و هەولێر دەکات.

 

چیرۆکی سەرەکی: لە دوایین کۆبوونەوەی ئەنجوومەنی وەزیرانی هەرێمی کوردستان  تایبەت بە پرسی مووچە، گفتوگۆی ئەوە کراوە، ئەوەی حکومەتی عێراق بەرامبەر خەڵکی کوردستان دەیکات ستەمە، لە ئەگەری بەردەوام بوونی دۆخەکە و چارەسەرنەکردنی کێشەکان، بەتایبەت لە پرسی مووچەدا، ئەوا لە سەرەتای ئەمساڵدا "هەڵوێستی تووند دەنوێنین تاوەکو دەگاتە کشانەوەی کورد لە پرۆسەی سیاسیی عێراق".

 

لێدوانی تایبەت: عارف حەمامی، پەرلەمانتاری هاوپەیمانی دەوڵەتی یاسا بە ئاڤا میدیای ڕاگەیاند: بوونی کورد لە پرۆسەی سیاسی عێراقدا پێویستییەکی نیشتمانییە و دەکرێت هەموو کێشەیەک بە دانوستان چارەسەر بکرێت، پێشتریش گفتوگۆکانی نێوان بەغدا و هەولێر لەسەر زۆر دۆسیەی هەڵپەسێردراو ئەرێنی بوون و هەموو لایەنەکان پشتگیری لە نزیکبوونەوە و بەردەوامبوونی گفتوگۆکان دەکات.

 

لەلایەکی دیکەوە: عەزام حەمدانی، سەرکردە لە هاوپەیمانی عەزم بەئاڤا میدیای ڕاگەیاند: کورد لایەنێکی سەرەکی پرۆسەی سیاسی عێراقە و سەنگی خۆی هەیە، بە هیچ شێوەیەک سەرجەم لایەنە سیاسییەکانی عێراق کشانەوەی کورد لە گۆڕەپانی سیاسی عێراق قبوڵ ناکەن.

 

ئەمەش بزانە: کورد چەندین پۆستی سیادی و باڵای  لە پڕۆسەی سیاسی و حکومەتی عێراقدا هەیە، جگە لەوەش خاوەنی 70 کورسی پەرلەمانی عێراقە.