شوان کەلاری: بە کشانەوەی کورد شتێک بەناوی دەوڵەتی عێراق نامێنێت

ئاڤا نیوز

 

سبەی کۆبوونەوەیەکی چارەنووسساز و گرنگ بە سەرپەرشتیی سەرۆکوەزیران مەسرور بارزانی لە شاری هەولێر بەڕێوەدەچێت، ئەندامێکی ئەنجوومەنی نوێنەرانی عێراقیش پێیوایە "بە کشانەوی کورد شتێک بەناوی دەوڵەتی عێراق نامێنێت".

 

وێنە گەورەکە: سبەی شەممە 11-1-2025، کۆبوونەوەیەکی نائاسایی لە ئەنجوومەنی وەزیرانی هەرێمی کوردستان بە سەرپەرشتیی سەرۆکوەزیران مەسرور بارزانی و ئامادەبوونی نوێنەرانی هەرێمی کوردستان لە حکومەتی فیدراڵی و سەرۆکی فراکسیۆنە کوردستانییەکانی زۆربەی لایەنەکان بەڕێوە دەچێت، کۆبوونەوەکە تایبەتە بە پرسی مووچە و شایستە داراییەکانی هەرێمی کوردستان لە حکومەتی فیدراڵ.

 

لێدوانی فەرمی: شوان کەلاری، ئەندامی ئەنجوومەنی نوێنەرانی عێراق بە ئاڤا میدیای ڕاگەیاند: لە کاتێکدا کە ئەگەری گۆڕانکاریی گەورە لە ڕۆژهەڵاتی ناوەڕاست هەیە، کشانەوەی کورد لە پرۆسەی سیاسیی عێراق، وا دەکات وڵاتەکە بنەماکانی دەوڵەتبوون لەدەست بدات و زەرەرمەندی یەکەمیش عێراق دەبێت، چونکە لە بنەڕەتدا لەسەر بنەمای شەراکەت دامەزراوە. 

 

کەلاری گوتی: ئەگەر کورد لە پرۆسەی سیاسیی عێراق بکشێتەوە، شتێک بەناوی دەوڵەتی عێراق نامێنێت. 

 

زانیاریی زیاتر: پێشتر وتەبێژی حکومەتی هەرێمی کوردستان بە ئاڤا میدیای ڕاگەیاندبوو، نابێت له‌ ساڵی‌ نوێدا به‌مجۆره‌ مامه‌ڵه‌ له‌گه‌ڵ‌ فه‌رمانبه‌رانی‌ هه‌رێمی کوردستان بكرێت، ئەگەر مامەڵەی بەرپرسانی بەغدا بەمجۆرە بەردەوام بێت، کشانەوە لە بەغدا ئەگەرێکی بەهێز دەبێت.