ڕێباز حەملان: وەزارەتی دارایی عێراق نیازی ناردنی مووچەی مانگی 12ی نییە

ئاڤا نیوز

 

بریکاری وەزیری دارایی عێراق ڕوونکردنەوە لەسەر مووچەی مانگی 12 و هۆکاری خەرجنەکردنی لەلایەن وەزارەتی دارایی فیدراڵ دەخاتەڕوو  و ئاماژە بە ناوەڕۆکی هەردوو کۆبوونەوەکەی ئەمڕۆی هەولێر و بەغدا دەکات.

 

وێنە گەورەکە: ئەنجوومەنی وەزیرانی هەرێمی کوردستان بە سەرپەرشتیی سەرۆکوەزیران مەسرور بارزانی و ئامادەبوونی قوباد تاڵەبانی و نوێنەرانی هەرێمی کوردستان لە بەغدا لەبارەی مووچە و بودجە و مافە دەستووری و یاساییەکانی هەرێمی کوردستان کۆبووەوە. لەهەمان کاتدا تەیف سامی، وەزیری دارایی عێراق لە بەغدا لەبارەی هەموارکردنەوەی یاسایی بودجە و هەناردەکردنەوەی نەوتی هەرێمی کوردستان لەگەڵ لیژنەی دارایی ئەنجوومەنی نوێنەرانی عێراق کۆبووەوە، لەمبارەیەوە ڕێباز حەملان میوانی گەشتی هەواڵەکانی کاتژمێر 07:00ی ئاڤا میدیا بوو و ڕوونکردنەوە لەسەر هەردوو کۆبوونەوەکە دەدات.

 

لێدوانی فەرمی: ڕێباز حەملان، بریکاری وەزارەتی دارایی عێراق ڕایگەیاند:

 

- "وەزارەتی دارایی عێراق نیازی نییە هیچ بڕە پارەیەکی دیکە بۆ مووچەی مانگی 12 خەرج بکات".

- "بۆ مانگی یەکی ساڵی 2025 لیستی مووچە بە ئەلیکترۆنی بۆ وەزارەتی دارایی فیدراڵ دەنێردرێت، سەرجەم مانگەکانی ئەمساڵ بەم شێوەیە دەبن".

 

- شاندی هەرێمی کوردستان سەردانی بەغدا ناکەن و پەیامەکان لەڕێگەی فواد حسێن، وەزیری دەرەوەی عێراق دەنێردرێن.

 

 - مانگی 5ـی ساڵی 2024 شاندێکی هەرێمی کوردستان لەگەڵ سوودانی کۆبوونەتەوە و پێیان گوتووە فەرموون ئەوە 100% داهاتی ناوخۆ، "ئێوەش پشکی ئێمە لە بودجە بدەن، گوتوویەتی ناتوانم"، بەڵکو بە شاندی هەرێمی کوردستانی وتبوو "لەسەر وەرگرتنی 50%ـی داهاتی ناوخۆ ڕێککەوتین".

 

- "دەستمان لە مووچەی مانگی 12ی ساڵی ڕابردوو نەشۆریوە و هەوڵەکان بەردەوامن".

 

- بۆ موازەنەی ساڵی 2026 دەبێت بەگوێرەی نوێترین ئاماری سەرژمێری، پشکی هەرێمی کوردستان 14.1% بێت.