ڕێباز حەملان وەڵامی سوودانی سەبارەت بە ڕادەستکردنی 100%ـی داهاتی ناوخۆ ئاشکرا دەکات

ئاڤا نیوز

 

یەکێک لە بیانووە بەردەوامەکانی وەزارەتی دارایی فیدراڵی لەسەر نەناردنی شایستە داراییەکانی هەرێمی کوردستان، ڕادەستنەکردنی 50%ـی داهاتی نانەوتی هەرێمی کوردستانە، لە کاتێکدا حکومەتی هەرێمی کوردستان ئامادەبووە 100%ـی داهات ڕادەست بکات، بەو مەرجەی سەرجەم شایستە داراییەکان دابین بکرێت.

 

چیرۆکی سەرەکی: مانگی 5ـی ساڵی 2024 شاندێکی هەرێمی کوردستان چوونەتە بەغدا و پەیامی سەرۆکوەزیران مەسرور بارزانییان بە سوودانی گووتوە بەوەی هەرێمی کوردستان ئامادەیە 100%ـی داهاتی نانەوتی ڕادەستی بەغدا بکات و هەناردەی نەوتیش دەست پێبکاتەوە کە خۆتان ڕاتانگرتووە، بەو مەرجەی پشکی هەرێمی کوردستان لە بودجە بەتەواوەتی خەرج بکات بە خەرجی بەکاربردن (تەشغیلی) و وەبەرهێنان (ئیستسماری)یشەوە، بەڵام سوودانی گوتوویەتی "ناتوانم ئەوە بکەم." چەند ڕۆژێک ئاڤا ئەو زانیارییەی ئاشکرا کرد و ئەمڕۆش رێباز حەملان بۆ ئاڤا زانیارییەکەی پشتڕاست کردەوە.

 

لێدوانی فەرمی: ڕێباز حەملان، بریکاری وەزارەتی دارایی عێراق لەمیانی بەشداریکردنی لە گەشتی هەواڵەکانی سەعات 07:00ی ئاڤا میدیا سەبارەت بە ڕادەستکردنی داهاتی نانەوتی گوتی، "سوودانی بە شاندی هەرێمی کوردستانی گوتووە بەگوێرەی ئەو ڕێنماییانەی لە ئینفاقی فعلی هەیە، لە دەسەڵاتی مندا نییە بڕیار لە خەرجی بەکاربردن و وەبەرهێنان بدەم و لەگەڵ نێچیرڤان بارزانی ڕێککەوتووین لەسەر وەرگرتنی 50%ـی داهاتی نانەوتی هەرێمی کوردستان."

 

ئەوەی پێویستە بیزانیت: بەهاری 2024 دوای سەردانی نێچیرڤان بارزانی، سەرۆکی هەرێمی کوردستان بۆ بەغدا  و کۆبوونەوەی لەگەڵ محەممەد شیاع سوودانی، سەرۆکوەزیرانی عێراق ڕێککەوتن لەسەر ئەوەی هەرێمی کوردستان 50%ـی داهاتی نانەوتی ڕادەستی حکومەتی فیدراڵی بکات، لە بەرامبەردا ئەوانیش شایستە داراییەکانی هەرێمی کوردستان دابین بکەن.