پێشەوا هەورامانی: ئەمڕۆ چەند ڕێوشوێنێکی ژینگەپارێزی دەگیرێتەبەر

ئاڤا نیوز

 

ئەمڕۆ کۆبوونەوەیەکی تایبەت بە پرسی پیسبوونی ژینگەی هەرێمی کوردستان بە سەرپەرشتی سەرۆکوەزیران مەسرور بارزانی بەڕێوەچوو و چەند بڕیاڕێکی گرنگی تێدادرا لەبارەی ئەو کارگە و شوێنانەی کە دەبنە هۆی پیسکردنی ژینگە. 

 

لێدوانی فەرمی: پێشەوا هەورامانی، وتەبێژی حکومەتی هەرێمی کوردستان لە کۆنگرەیەکی ڕۆژنامەوانیدا ڕایگەیاند: ئەمڕۆ یەکشەممە کۆبوونەوەیەک بە سەرپەرشتی سەرۆکوەزیران مەسرور بارزانی بەڕێوەچوو کە وەزیرانی ناوخۆ و ژینگە و پارێزگارەکانی تیدا بەشداربوون، کۆبوونەوەکە تایبەت بوو بە پرسی ژینگەی هەرێمی کوردستان و تیایدا چەندین بڕیاری گرنگدران. 

 

وتەبێژی حکومەتی هەرێمی کوردستان باسی لەوەشکرد، بڕیارێکی گرنگ لەبارەی ئەو کارگە و شوێنکارانە دەرکراوە کە ژینگە پیس دەکەن، دەبێت هەموو ئەو کارگانەی پاشماوەی دووکەڵیان هەیە خۆیان لەگەڵ ستانداردی جیهانی بگونجێنن بە پێچەوانەوە ڕووبەڕووی سزادان و داخستن دەبنەوە. 

 

بەشێک لەو خاڵانەی کە پێشەوا هەورامانی لە کۆنگرە ڕۆژنامەوانییەکەیدا ئاماژەی پێدا:-

 

• - سزاکان تەنیا ماددی نابن بەڵکو داخستنی شوێنی کار و بەندکردنیشی تێدا دەبێت.
• - لیژنەیەک سەردانی مۆلیدە ئەهلییەکان دەکات بۆ زانینی ڕەچاوکردنی مەرجی تەندروستی.
• - ئەوانەی بەنزینی خراپ دەفرۆشن رێکاریان بەرامبەر دەگیرێتەبەر.
• - ڕێگا نادرێت ئاوی پیس بۆ ئاودانی سەوزە بەکاربێت.
• - هەموو ئەو کارگانەی پاشماوەی دووکەڵیان هەیە دەبێت خۆیان لەگەڵ ستانداردی جیهانی بگونجێنن.
• - ئۆتۆمبێلێک مەرجی ژینگەیی تێدا نەبێت سزا دەدرێن.
• - هەر شوێنێک ئۆتۆمبێلی بەردی ئیگزۆز بفرۆشێت سزاکەی تا داخستن دەبێت.
• - ئۆتۆمبێلی بێ سەرەتا لە پارێزگای هەولێر و دهۆک نییە.
• - کابینەی نۆ لەگەڵ دروستکردنی پۆند و بەنداو شۆڕشی کرد.

 

ڕاگەیێنراوی فەرمی: بەگوێرەی ڕاگەیێنراوێکی حکومەتی هەرێمی کوردستان کە لەو بارەیەوە بڵاویکردووتەوە، سەرۆکوەزیران مەسرور بارزانی ئاماژەی بەوەدا، پرسی ژینگەپارێزی بەشێکی گرنگی کارنامەی حکومەتە، پێویستە ئەرک و خەمی هەموومان بێت و ژینگە و سرووشتی جوانی کوردستان بە پاکی ڕابگرین.

 

هەر لە ڕاگەیێنراوەکەدا چەند خاڵێک خراونەتەڕوو:- 

 

یەکەم: لە ئەمڕۆوە هەر پاڵاوگەیەک، یان هەر کارگەیەک کە لە دەرەوەی مەرج و ڕێنماییەکان کار بکات و ببێتە هۆی پیسبوونی ژینگە، ڕێکاری یاسایی بەرامبەر دەگیرێتەبەر.

 

دووەم: ڕێگە لە هەر پاڵاوگەیەک یان هەر کەس و لایەنێک دەگیرێت کە سووتەمەنی پیسی ئۆتۆمبێل بەرهەمدەێنێت یان بە قاچاخ دەیهێنێت و زیانی تەندروستی هەیە. هەروەها دەبێت سنوورێک بۆ سووتانی گازی هاوەڵ (الغاز المصاحب) لە کێڵگە نەوتییەکان دابنرێت.

 

سێیەم: دەبێت خاوەنی مۆلیدەکانی کارەبا، پابەندی ڕێنماییەکانی حکومەت بن، فیلتەریان بۆ دەنگ و پیسی هەبێت، هەر کەسێک سەرپێچی بکات ڕێکاری یاسایی بەرامبەر دەگیرێتەبەر.

 

چوارەم: ڕێگری لە بەکارهێنانی ئاوی پیس و ئاوەڕۆکان بکرێت کە بۆ ئاودانی سەوزە و ئاودێری بەکاردەهێنرێت.