ناوی 150 هه‌زار فه‌رمانبه‌ر بۆ وه‌رگرتنی زه‌وی ڕه‌وانه‌ی ئه‌نجوومه‌نی وه‌زیران ده‌كرێت

ئاڤا نیوز

 

قۆناغی دووەمی دابەشکردنی زەوی دەست پێدەکات و سبه‌ی ناوی 150 هه‌زار فه‌رمانبه‌ر بۆ وه‌رگرتنی زه‌وی ڕه‌وانه‌ی سه‌رۆكایه‌تیی ئه‌نجوومه‌نی وه‌زیران ده‌كرێت به‌مه‌به‌ستی په‌سه‌ندكردنیان.

 

وێنە گەورەکە: پرۆسەی دابەشکردنی زەوی بەسەر فەرمانبەران و خانەنشینان لە هەرێمی کوردستان نەوەستاوە و حکومەت دڵنیایی دەدات زەوی بە هەر کەسێک دەدات مەرجەکان بیگرێتەوە.

 

لێدوانی فەرمی: سه‌ربه‌ست مه‌ولوود، سەرپەرشتیاری تیمی وردبینی و ڕێکخستنی فۆڕمی دابەشکردنی زەوی له‌ وه‌زاره‌تی شاره‌وانی بە ئاڤا میدیای ڕاگەیاند: له‌و ماوه‌یه‌دا وردبینی بۆ ناوی 150 هه‌زار فه‌رمانبه‌ر كراوه‌، ئه‌وانه‌ی فۆرمیان بۆ وه‌رگرتنی زه‌وی پڕكردووەته‌وه‌ و بڕیاره‌ سبەی به‌ نووسراوی فه‌رمی لیستی ناوی 150 هه‌زار فه‌رمانبه‌ر ڕه‌وانه‌ی سه‌رۆكایه‌تیی ئه‌نجوومه‌نی وه‌زیران بکرێت به‌ مه‌به‌ستی په‌سه‌ندكردنیان.

 

زانیاری زیاتر: فۆڕمی ئه‌و 150 هه‌زار فه‌رمانبه‌ره،‌ هی هه‌ر چوار پارێزگا و ئیداره‌ سه‌ربه‌خۆكان له‌ خۆ ده‌گرێت و هه‌موو وه‌زاره‌ت و فه‌رمانگه‌كانی حكومه‌تی هه‌رێمی كوردستانیشی تێدایه‌، ئه‌مه‌ش ده‌بێته‌ دووه‌م قۆناغی دابه‌شكردنی زه‌وی.

 

بۆچی گرنگە: پێشبینی ده‌كرێت له‌ ئاینده‌یه‌كی نزیكدا سه‌رۆكایه‌تیی ئه‌نجوومه‌نی وەزیران لیستی ناوی ئه‌و 150 هه‌زار فه‌رمانبه‌ره‌ په‌سه‌ند بكات و بگه‌ڕێته‌وه بۆ وه‌زاره‌تی شاره‌وانی و گه‌شتوگوزار تا بخرێته‌ بواری جێبه‌جێكردنەوە.

 

ئەوەی پێویستە بیزانیت: لە قۆناغی یەکەم زیاتر لە 15 هەزار پارچە زەوی دابەش کران، لە قۆناغی دووەمیش 150 هه‌زار کەس وەری دەگرن، تەنیا نزیکەی 150 هەزار کەسی دیکە ماوە فۆرمەکانیان وردبینی تێدا بکرێت، ئەوانیش پێکدێن لە فەرمانبەرانی وەزارەتەکانی تەندروستی، ئەوقاف، کشتوکاڵ و خانەنشینانی هەرێمی کوردستان.