ئاستەنگ بۆ کارکردن لە پردی تووەقوتی هەڵەبجە دروست دەبێت

ئاڤا نیوز

 

بەهۆی بەرزبوونەوەی ئاستی ئاو، کارکردن لە درووستکردنی بیناسازی پردی تووەقوت لە پارێزگای هەڵەبجە ئاستەنگی بۆ درووست دەبێت، پێویستە گۆڕانکاری لە دیزاینی درووستکردنەکەی بکرێت.

 

وێنە گەورەکە: پردی تووەقوت یەکێکە لە پڕۆژە گرنگ و ستراتیژییەکانی پارێزگای هەڵەبجە، ڕۆژی 22ی شوباتی ساڵی ڕابردوو، مەسرور بارزانی، سەرۆکی حکومەتی هەرێمی کوردستان بەردی بناغەکەی دانا و دەستبەکارکردن کرا تێیدا بەڵام ئێستا بەهۆی بەرزی ئاستی ئاو دەبێت گۆڕانکاری لە دیزاینەکەیدا بکرێت و ئەمەش پارەی دیکەی پێویستە.

 

لێدوانی فەرمی: جەمال عومەر، بەڕێوەبەری بەشی پلاندانان لە پارێزگای هەڵەبجە بە ئاڤا میدیای ڕاگەیاند:

- کارکردن لە پرۆژەکە بەردەوامە، لە ئێستادا کار لەڕێگاسازییەکەیدا دەکرێت کە نزیکەی 27 کم دەبێت، بەڵام بەهۆی بەرزی ئاستی ئاوەوە کارەکانی بیناسازی پردەکە کۆسپی بۆ دروست بووە.

 

- دەبێت دووبارە پردەکە دیزاین بکەینەوە، بڕیاردراوە بەهۆی بەرزی ئاستی ئاوەکە دیزاینەکەی لە 5 مەترەوە بەرزبکەینەوە بۆ 15 مەتر، ئەم دەستکاریکردنەی دیزاینەکەش خەرجی دیکەی دەوێت و پێویستی بە زیادکردنی بوودجەی پڕۆژەکە دەبێت.

 

 

باکگراوند: پردی تووەقوت کە زیاتر لە 30 ملیار دیناری بۆ تەرخانکراوە، یەکێکە لەو پڕۆژە ستراتیژییانەی کە هەڵەبجە و گەرمیان بەیەکەوە دەبەستێتەوە، بە تەواوبوونیشی دەبێتە ڕێگای سەرەکی بازرگانی پارێزگای هەڵەبجە.