پەرلەمانتارێکی یەکێتیی: عێراق زیاتر لە تریلیۆنێک دیناری بۆ هەرێمی کوردستان نەناردووە

ئاڤا نیوز

 

دوای پێداچوونەوە بە پارەی نێردراو لە بەغداوە بۆ مووچەی فەرمانبەرانی هەرێمی کوردستان، دەردەکەوێت ڕاگەیێنراوەکەی وەزارەتی دارایی عێراق هەڵەی تێدایە و بەغدا زیاتر لە ترلیۆنێک دینار لە شایستەی دارایی هەرێمی کوردستانی نەناردووە.

 

وێنە گەورەکە: ناردنی مووچەی مووچەخۆرانی هەرێمی کوردستان لە ساڵی 2024 کاردانەوەی جیاوازی بەدوای خۆیدا هێناوە. هەردوو وەزارەتی دارایی هەرێمی کوردستان و وەزارەتی دارایی عێراق بە ڕاگەیێنراو ئامارەکانیان بڵاوکردووەتەوە و یەکدی بە کەمتەرخەم و پێشێلکردنی بڕیارەکانی دادگەی فیدراڵی تۆمەتبار دەکەن.

 

زانیاریی بەدەستهاتوو: لە دوایین کۆبوونەوەی پەرلەمانی عێراق، کە ڕۆژی دووشەممە 13-01-2025 کرا و بەڕێوەبەرە گشتییەکانی (بودجە، ژمێرکاری و قەرزی گشتی) وەزارەتی دارایی عێراق ئامادە بوون، داتاکانی ساڵی ڕابردوو خرانەڕوو و لە خشتەی بودجە دەرکەوتووە لە پشکی مووچەی مووچەخۆرانی کوردستان بۆ ساڵی 2024 یەک تریلیۆن و 17 ملیار و 892 ملیۆن دینار کەمتر نێردراوە. پێش ئەو کۆبوونەوەیە جێگری سەرۆکی پەرلەمانیش ڕایگەیاند، بەغدا پارەی دوو مووچەی لەلا ماوە.

 

لێدوانی فەرمی: د. نەرمین مەعرووف، ئەندامی لیژنەی دارایی لە پەرلەمانی عێراق بە ئاڤای ڕاگەیاند: "بەپێی داتاکانی وەزارەتی دارایی عێراق، دەرکەوت تاوەکو کۆتایی مانگی دوازدە، 10 تریلیۆن و 738 ملیار و 629 ملیۆن دینار بۆ مووچەی مووچەخۆرانی هەرێمی کوردستان (فەرمانبەران، خانەنشینان و  چاودێری کۆمەڵایەتی) خەرجکراوە، لە کۆی 11 تریلیۆن و  576 ملیار و 521 ملیۆن 335 هەزار دینار".

 

چی ڕوودەدات: هێشتا فەرمانبەرانی هەرێمی کوردستان مووچەی مانگی دوازدەی ساڵی 2024ـیان وەرنەگرتووە و وا چاوەڕوان دەکرێت ئەو مووچەیە بفەوتێت، چونکە محەممەد شیاع سوودانی لەدوایین کۆبوونەوەکاندا بە بەرپرسانی هەرێمی کوردستانی ڕاگەیاندووە، مووچەی مانگی دوازدە نانێرێ و بۆ مووچەکانی ساڵی نوێی 2025یش دەبێ ڕێککەوتنی نوێ بکرێت.