هەڵوێستی نوێی سوودانی لەبارەی مووچەی مانگی 12 و مووچەکانی ئەمساڵ

ئاڤا نیوز

سوودانی بە ڕاشکاوی بە بەرپرسانی هەرێمی کوردستانی گوتووە مووچەی مانگی 12ی ساڵی ڕابردوو نانێرێت، بۆ مانگی یەک و تەواوی مووچەکانی ئەمساڵیش وتوویەتی دەبێت ڕێککەوتنی نوێ بکرێت.

چیرۆکی سەرەکی: ئێوارەی دوێنێ لەکاتێکدا شاندێکی باڵای هەرێمی کوردستان لە بەغدا بوون بۆ بەشداریکردن لە کۆبوونەوەی هاوپەیمانیی ئیدارەی دەوڵەت، پێش دەستپێکردنی کۆبوونەوەکە، وەزارەتی دارایی عێراق ڕاگەیێنراوێکی تووندی لەبارەی مووچەی خەڵکی کوردستان بڵاوکردەوە و ڕایگەیاند، ساڵی 2024 تەواوی پارەی مووچەی بۆ هەرێمی کوردستان ناردووە، ڕاگەیێنراوەکە ڕوون و ڕاشکاو بوو کە مووچەی مانگی 12 نانێرێت.

زانیاریی تایبەت: نوێترین هەڵوێستی محەممەد شیاع سوودانی، سەرۆکوەزیرانی عێراق لەبارەی مووچە بریتییە لە:

٠ ئەمڕۆ بە بەرپرسانی هەرێمی کوردستانی گوتووە، مووچەی مانگی 12ی ساڵی ڕابردوو نانێرێت و وەزارەتی دارایی عێراق هەمووی ناردووە. 

٠ بۆ مانگی یەک و 12مووچەکەی ئەمساڵیش سوودانی وتوویەتی دەبێت ڕێککەوتنی نوێ بکرێت، یاسای بودجە هەموار بکرێتەوە و دەست بە هەناردەکردنەوەی نەوتی کوردستان بکرێتەوە.

٠ بەپێی زانیارییەکانی ئاڤا میدیا، ڕاگەیێنراوەکە بۆچوون و بڕیاری سوودانی بووە نەوەک وەزارەتی دارایی عێراق، تەنانەت ئاڤا زانیویەتی کاتێک ڕاگەیێنراوەکە بڵاوکراوەتەوە تەیف سامی لە عێراق نەبووە و بە سەردانێک لە دەرەوە بووە.

لەلایەکی دیکەوە: هاوپەیمانیی ئیدارەی دەوڵەتییش کە دوێنێ شەو بە بەشداریی نیچیرڤان بارزانی و بافڵ تاڵەبانی کۆبووەوە، ڕاگەیێنراوێکی بڵاوکردەوە و باسی مووچەی تێدابوو، کە هیچ هەڵوێستێکی سیاسی لەسەر پرسی مووچەی مووچەخۆرانی هەرێمی کوردستان نییە، جگە لە بواری تەکنیکی نەبێت، ئەویش دەکرێت لە ڕێگەی گفتوگۆ و لێکتێگەیشتنەوە چارەسەر بکرێت. 

هەنگاوی داهاتوو: ئێستا محەممەد شیاع سوودانی بە سەردانێک لە بەریتانیایە، هەرێمی کوردستان چاوەڕوان دەبێت تاوەکو دەگەڕێتەوە، ئینجا وەزیرەکانی پارتی و یەکێتی لە بەغدا سەردانی دەکەن و هەڵوێستیی حکومەتی هەرێمی کوردستانی پێدەگەیێننن لەبارەی مووچە و بودجە،  واتا بڕیارەکانی کۆبوونەوە نائاساییەکەی ئەنجوومەنی وەزیران، کە دەبێت ئەمساڵ مووچە و شایستە داراییەکانی خەڵکی کوردستان دابین بکرێن و هاوشێوەی ساڵی ڕابردوو نەبێت.