گۆتێرێس: بۆ ڕووبەڕووبوونەوەی ئاستەنگییەکان هەماهەنگی لەگەڵ عێراق دەکەین

ئاڤا نیوز

 

سکرتێری گشتیی نەتەوە یەکگرتووەکان دەڵێت، عێراق لە ئاستی هەرێمیدا ڕۆڵی ئەرێنی هەیە بۆ بەهێزکردنی ئاسایش و گەشەسەندنی ناوچەکە، جەختیش دەکاتەوە کە بۆ ڕووبەڕووبوونەوەی ئاستەنگییەکان نەتەوە یەکگرتووەکان لەگەڵ عێراق هەماهەنگی دەکات.

 

ئەوەی پێویستە بیزانیت: لە چەند ڕۆژی ڕابردوودا و بۆ یەکەمجار، عێراق سەرۆکایەتیی گرووپی کۆمەڵەی 77 و چین-ـی وەرگرت، کە یەکێکە لە گەورەترین کۆمەڵەکانی هەماهەنگی نێودەوڵەتی لەنێوان وڵاتانی تازەگەشەسەندوو، لای خۆیەوە نەتەوە یەکگرتووەکان ئەو گرووپەی بە هاوبەشێکی ستراتیژیی ناوبردووە.

 

لێدوانی فەرمی: ئەنتۆنیۆ گۆتێرێس، سکرتێری گشتیی نەتەوە یەکگرتووەکان، لە میانی پێشوازیکردنی لە فوئاد حوسێن، جێگری سەرۆکوەزیران و وەزیری دەرەوەی عێراق ڕایگەیاند:

 

- پێویستە هەماهەنگی لەنێوان عێراق و نەتەوە یەکگرتووەکان بۆ  ڕووبەڕووبوونەوەی ئاستەنگییەکان بەهێزبکرێت، بۆ بەهێزکردنی ئاسایش و گەشەسەندنی ناوچەکەش پشتیوانی هەوڵەکانی عێراق دەکەن.

 

- ستایشی ڕۆڵی عێراق دەکەم بەتایبەت لە دۆسیەی پەیوەست بە گۆڕانکارییەکانی سووریا، فەڵەستین و لوبنان.

 

لەلایەکی دیکەوە: وەزیری دەرەوەی عێراق ستایشی کارەکانی یونامی لە عێراق کردووە و بە پێویستی زانیوە چارەسەری خێرا بۆ قەیرانەکانی ئێستا بدۆزرێتەوە بەجۆرێک ئاسایش و ئارامی هەرێمی بەهێزتر بکات.