میت کوژرانی فەرماندەیەکی سەر بە پەکەکە لە پێنجوێن ڕادەگەیێنێت

ئاڤا نیوز 

 

میدیاکانی تورکیا لە زاری دەزگای هەواڵگریی وڵاتەکە، کوژرانی ئامەد سەرهەد، ناسراو بە ئیسلام دۆتکانلۆ، بەرپرسی ئەکادیمیای فەرماندەیی پژاک-پەکەکە، لەگەڵ شڤان چیا ناسراو بە ئاکام شاهی، پاسەوانەکەی لە قەزای پێنجوێنی شاری سلێمانی کوژراون، بەڵام میدیای پەکەکە تاوەکو ئێستا هەواڵەکەیان پشتڕاست نەکردووەتەوە.

 

چیرۆکی سەرەکی:  ئامەد سەرهەد، ناوی لە لیستی داواکراوانی میتدا هەبووە، هەواڵگریی تورکیا بە پشت بەستن بە هەواڵگرییەکانی لە ناوچەکەدا، شوێنەکەیان دیاری کردووە، دواتر ئۆپەراسیۆنێکیان لە شوێنی مانەوەی کە  لە قەزای پێنجوێنی سەر بە پارێزگای سلێمانی بووە، ڕێکخستووە، بەپێی زانیارییەکانی میت بەرپرسی فەرماندەیی ئەکادیمی پەکەکە و پاسەوانەکەی کراوەنەتە ئامانج و کوژراون.

 
ڕاگەیێنراوی فەرمی: میدیاکانی تورکیا لەسەر زاری میت ڕایانگەیاندووە: ئامەد سەرهەد ناسراو بە ئیسلام دۆتکانلو، کە لە دامەزرێنەرانی پژاکی لقی ئێرانی پەکەکەیە، بەرپرسی ئەکادیمیای مەشقی فەرماندەیی سمکۆ سەرهەڵدان، و پاسەوانەکەی شڤان چیا بە ناوی ئاکام شاهێ لە قەزای پێنجوێنی سەر بە شاری سلێمانی کوژراون.

 

بۆچوونی لایەنی بەرامبەر: میدیاکانی پەکەکە هەواڵی کوژرانی ئەو دوو کەسەیان پشتڕاست نەکردووەتەوە.

 

باکگراوند: سەرهەد پێشووتر لە شارەکانی ئامەد و بەدلیسی باکووری کوردستان لە ڕیزەکانی پەکەکە کاری کردووە، بەهۆی چالاکییەکانی دژی سوپای تورکیا ناوی چووەتە لیستی داواکراوەکان، داوتر هاتووەتە سلێمانی لەوێ دەستی بە چالاکییەکانی کردووە.