ئەمریکا بۆ مەسرور بارزانی: پێگە و ڕۆڵی هەرێمی کوردستان وەک هاوبەشێکی ئەمریکا گرنگە

ئاڤا نیوز 

 

 ڤیکتۆریا تەیلەر، جێگری یاریدەدەری وەزیری دەرەوەی ئەمریكا لە میانی کۆبوونەوەی لەگەڵ سەرۆکوەزیران مەسرور بارزانی جەختی لە گرنگیی پێگە و ڕۆڵی هەرێمی کوردستان وەک هاوبەشێکی وڵاتەکەی کردەوە.

 

وێنە گەورەکە: ڕۆژی چوارشەممە 15-01-2025 سەرۆکوەزیران مەسرور بارزانی پێشوازی له‌ ڤیکتۆریا تەیلەر جێگری یاریدەدەری وەزیری دەرەوەی ئەمریكا  كرد له‌ كۆبوونه‌وه‌کەدا كه‌ ستیڤ بیتنەر، کۆنسوڵی گشتیی ئه‌مريكا لە هەرێمی کوردستان و سکۆت بۆڵز، نێردەی تایبەتی وەزارەتی دەرەوەی ئەمریکا بۆ باکووری ڕۆژهەڵاتی سووریا ئامادەی بوون، پەرەپێدانی پەیوەندیی دوولایەنە و هەوڵەکانی پێکهێنانی کابینەی نوێی حکومەتی هەرێمی کوردستان و  گۆڕانکاری و پەرەسەندنەکانی دۆخی گشتیی عێراق و سووریا تاوتوێ کرا. 

 

ڕاگەیێنراوی فەرمی: بەپێی ڕاگەیێنراوێک کە لەلایەن حکومەتی هەرێمی کوردستانەوە بڵاوکراوەتەوە، لە کۆبوونەوەکەدا ئەمانە باس کراون: 

 

- جێگری یاریدەدەری وەزیری دەرەوەی ئەمریكا ، جەختی لە گرنگیی پێگە و ڕۆڵی هەرێمی کوردستان وەک هاوبەشێکی وڵاتەکەی کردەوە.

 

- هەردوولا هاوڕابوون لە سەر گرنگیی هەناردەکردنەوەی نەوتی هەرێمی کوردستان لە زووترین کاتدا، چونکە لە بەرژەوەندی هەموو لایەکدایە و  وەستانی زیانێکی زۆری بە بودجەی گشتیی عێراق گەیاندووە.

 

بەشێکی دیکەی گفتوگۆکان تایبەت بوو بە پێویستی دابینکردنی ماف و شایستە داراییەکانی هەرێمی کوردستان، لەمبارەیەوە سەرۆکوەزیران مەسرور بارزانی دووپاتی کردەوە کە هەرێمی کوردستان، هەموو پابەندییەکانی خۆی لە چوارچێوەی بودجەدا جێبەجێ کردووە، بۆیە پێویستە بەغدا شایستە داراییەکانی هەرێمی کوردستان وەک قەوارەیەکی فیدراڵی و دەستووری بنێرێت. 

 

- دۆخی گشتی سووریا، تەوەرێکی دیکەی گفتوگۆکان بوو، هەردوولا هاوڕابوون لەسەر پێویستیی پاراستنی ئاسایش و ئارامیی سووریا و دەستەبەرکردنی مافەکانی گەلی کورد و پێکهاتەکانی دیکەی ئەو وڵاتە.