ئەو بۆمبەی لە گوندی گەزنە دۆزراوەتەوە بۆمبی ئەتۆمییە؟

ئاڤا نیوز

بەڕێوەبەرایەتیی كاروباری مین ڕایدەگەیەنێت، ئەو بۆمبەی لە گوندی گەزنەی باڵەکایەتی لە پارێزگای هەولێر دۆزراوەتەوە ناوەخنەكەی تەقەمەنی بەرزە و هیچ پەیوەندییەكی بە چەكی ئەتۆمی یاخود بالیستییەوە نییە.

چیرۆکی سەرەکی: دەنگۆی ئەوە بڵاوکرایەوە کەوا ئەو بۆمبە نیشانەی ئەتۆمی لەسەرە و دەركەوتووە ناوەخنەكەی تەقەمەنی بەرزە، بەڵام بەڕێوەبەرایەتیی كاروباری مینی هەولێر ڕەتی دەکاتەوە کە بۆمبەکە پەیوەندی بە چەكی ئەتۆمی یاخود بالیستییەوە هەبێت.

ڕاگەیێنراوی فەرمی: بەڕێوەبەرایەتیی كاروباری مین ڕایگەیاند:

- دوای ئاگاداركردنەوەمان بە هەبوونی بۆمبێك كە گوایە نیشانەی ئەتۆمی لەسەرە، دەستبەجێ کارمەندی شارەزا و پسپۆڕمان ڕاسپارد چارەسەری ئەم بۆمبە بکەن، ئەوان بۆمبەکەیان ناسیوەتەوە و دڵنیابوونە لەوەی کە ناواخنەکەی جۆری تەقەمەنی بەرزە (High Explosive)ـە.

- پسپۆڕەكانی بواری پووچەڵكردنەوەی مین و تەقەمەنی، توانیویانە بۆمبەکە سەلامەت بكەن، دواتر گواستوویانەتەوە بۆ چاڵی لەناوبردن و بە سەرکەوتوویی و بە بێ زیان، لەناویان بردووە.

 

ئەوەی پێویستە بیزانیت: دەزگای گشتیی مین هاووڵاتیان دڵنیادەكاتەوە لەوەی ئەو بۆمبە هیچ پەیوەندییەكی بە بۆمبی ئەتۆمی، چەكی ناوكی یاخود بالیستی نییە و داواش لە دەزگاكانی ڕاگەیاندن و بەكارهێنەرانی تۆڕە كۆمەڵایەتییەكان دەكات، بەرپرسیارانە مامەڵە لەگەڵ ئەوجۆرە بابەتانە بكەن و زانیاریی دروست بە لایەنی پەیوەندیدار و كەسانی شارەزا وەربگرن، دڵەڕاوكێ لەلای هاووڵاتیان دروست نەكەن.

باکگراوند: چەند ڕۆژێک پێش ئێستا لە زەوییەکی کشتوکاڵیدا لە گوندی گەزنە لە باڵەکایەتی، مووشەکێکی فڕۆکە دەکەوێتە خوارەوە، دوێنێ تیمەکانی ئیدارەی سەربەخۆی سۆران لە ڕووداوەکە ئاگادارکراونەتەوە و چوونەتە شوێنی کەوتنە خوارەوەی مووشەکەکە و پوچەڵیان کردەوە  .