مووشەکێک لەناو زەوییەکی کشتوکاڵی لە باڵەکایەتی دەکەوێتە خوارەوە

ئاڤا نیوز

 

مووشەکێک لەناو زەوییەکی کشتوکاڵیدا لە گوندی گەزنە لە دەڤەری باڵەکایەتی کەوتووەتە خوارەوە، شوێنی کەوتنە خوارەوەکەی نزیک ئاوەدانییە و مەترسی تەقینیشی لەسەرە، ئێستا تیمەکانی بەڕێوەبەرایەتی کاروباری مین خەریکی پووچەڵکردنەوەی مووشەکەکەن.

 

وێنە گەورەکە: چەند ڕۆژێک پێش ئێستا لە زەوییەکی کشتوکاڵیدا لە گوندی گەزنە لە باڵەکایەتی، مووشەکێکی فڕۆکە دەکەوێتە خوارەوە، ئەمڕۆ تیمەکانی ئیدارەی سەربەخۆی سۆران لە ڕووداوەکە ئاگادارکراونەتەوە و چوونەتە شوێنی کەوتنە خوارەوەی مووشەکەکە و ئێستا سەرقاڵی پوچەڵکردنەوەین.

 

لێدوانی فەرمی: عەلی عەبدولڕەحمان، بەڕێوەبەری گشتیی کاروباری مین لە پارێزگای هەولێر بە ئاڤا میدیای ڕاگەیاند: "دوای ئەوەی ئاگادارکراینەوە لەلایان هێزە ئەمنییەکانی قەزای چۆمان لە کەوتنە خوارەوەی مووشەکێک لە نزیک گوندی گەزنە، تیمەکانمان ناردووە بۆ گوندەکە بۆ پوچەڵکردنەوەی، تاوەکو بەزووترین کات مەترسی تەقینەوەی نەهێڵین".

 

گووتیشی: دوای لێکۆڵینەوەکانمان بۆماندەرکەوت، موشەکەکە بالیستیک نییە وەک ئەوەى باس دەکرێت، مووشەکى فڕۆکەیە و ئاراستەکراوە، لەناو زەوییەکى کشتوکاڵى گوندى گەزنەى باڵەکایەتى نزیک لە ئاوەدانى کەوتووەتە خوارەوە، بەپێى نووسینى سەر مووشەکەکەش بێت، پێدەچێت تورکى بێت.